مشاركة

ميت ألف فرصه عشان أسيب مصر
ولا عمري سبتها

علشان هى بلادي اللي بجد بحبها
بحبها بكدبها وصدقها

بحب فيها أصالة وندالة أهلها
بحب فيها السهر

بحب
زيفها وأصلها

بحب فيها طلعه الشمس
تنور وشها

بحب فيها القمر طالع
يغازل حسنها

بحب فيها المشي علي شط
نيلها وبحرها

بحب فيها بناتها
راسمين ملامح شعبها

دي بنت مايصه وحاطه
ورده فـ شعرها

ودي بنت جد ونازله
جري لشغلها

هتلاقي فين بلد
فيها الكنايس والجوامع
بتحضن بعضها

مسلم مسيحي إخوات
راضعين طيبة من صدرها
نبع الحنان ويناموا حاضنين
أرضها

هتلاقي فين تاني بلد
كل حاجه فيها
تخليك تحبها

هتقولي ظالمه هقولك
برضو بحبها
هتقولي ضالمه
مهو ده سواد شعرها

هتقولي زحمه هقولك
علشان بنعشق أرضها

هتقو لي فيها فساد
هقولك ده من طيبه شعبها

جرب كده تسهر ولو وحدك
علي ضف نيلها وحبها
جرب تشوف بنت حلوه
مع شاب واقف جمبها

بيحبها شايل في قلبه
هموم الدنيا كلها
وبرضو بيحبها

جرب كده تاكل دره وترمس
علي شطها

وتشوف وشوش الناس
وإضحك زيها

طب وإنت ماشي لوحدك
ووقعت في مشكله
مش بتلاقي ألف واحد
جمبك بيحلها

لا تعرفهم ولا يعرفوك
بس جمعكم حبها

اهي هي دي مصر
زاحمه ظالمه
فاسده ضالمه مش مهم
ده كفايه خفت دمها
هأفضل لمصر أقول وأعيد
أنا أصلي عاشق أرضها

وطبعا ده كله كلام في الهوا
أنا لو تجيني نص فرصة هقول لها
بالسلامه يا مصر
ومش عايز أشوف وشها
وهي دي بقى ندالة أهلها

هذه الكلمات جاءتني على الميل من شخص مغترب ردا على حوارات نقعد فيها ولا نمشي ؟

:)

اردت مشاركتكم وفقط

تحياتي

115) نأسف للإزعاج

ونحن أيضاً نأسف
سعد عبود كلمة حق حد ساااامع المشكلة تحولت من أنه حدد الانحراف بمبلغ أقل من الحقيقة عجباً المشكلة في الرقم ولا المشكلة في إنه يوجد سرقة ولا لأ .. مش بقولكم بلطجة
منى الحسيني رأت أن مكالمة الريس نوط شرف لها ؟؟؟؟ !!!!!
نأسف للمشاهدة الجبرية من قبل الأسرة

111) قل ولا تقل

قل البلد في حالة بلطجة ولا تقل في حالة فساد
الفرق كبير يا إخواني .. لألأ يا أصدقائي الفساد زي البرتقانة بتفسد حبة حبة من غير ما تحس في هدوء وخفية عن الأنظار وبعدين لما بتعرف بترميها وتجيب برتقان تاني صح ده اسمه تعريف الفساد الذي يصل للعفونة
الوضع دلوقتي مش كده الوضع دلوقتي بلطجة يعني انت عندك حق ومظلوم وطافح الدم بس توز فيك انت دبانة في بلد فقرانة والحكومة لازم تهشك .. انت عندك حق بس .. محدش يلوي دراعي .. ماشي في الممنوع عندك مانع أنا تبع ح ك و م ه . بتعترض بينا على المحكمة العسكرية بس أنا مش لابس ميري يا بيه ولو انت شايف ايه .. شايف يا بيه انك بتطلعلي لسانك هذا تعريف البلطجة
قل ولا تقل
كان برنامج إذاعي في الشرق الأوسط على ما أذكر وكانت بدايته مقولة لطه حسين لغتنا العربية يسر لا عسر ونحن نملكها كما كان القدماء يملكونها . حالياً أشك
أهم ما أتذكره قل تخرجت في جامعة كذا ولا تقل تخرجت من جامعة كذا
دمتم لي

97) المصري اليوم

في جريدة المصري اليوم

كما فكرت بمجرد قراءتي لخبر تكريم الريس للبعثات الرياضية التي أحرزت مراكز متقدمة أفريقياً ودولياً وجدت

شئ أثار حفيظتي بقدر كبير جداً
همسة عتاب
ليه ؟ أود أن أسأل محرر الخبر . الخبر يشير لتكريم 9 بعثات رياضية ونشرت بجانب الخبر 7 صور منها 5 تخص بعثة كرة القدم ومنها صورة اللاعب الهارب العائد مؤقتاً وصورتين فقط لإثنين من بعثة فريق اليد
عجباً يا الله ألم تكن صورة الشاب الرياضي الملتزم ذو الخلق عمرو شبانة رقم واحد على العالم في الاسكواش أو أحد زملائه أولى من اللاعب سيون ؟؟ عجبا ألم يمكن وضع صورة تمثل شخص من كل فرقة
أليس هناك رياضة في مصر الا القدم
عندهم حق ما فيش عقول ولا سواعد بس رجلين
عجبت لك يا زمن ساءني جدا جدا أن يصدر ذلك على صفحات المصري اليوم
وكما قلت ساء أحمد المسلماني نفس الشئ تقريباً على حد وصفه صورة لاعب سيون مع الرئيس في جريدة الأهرام
في أهرام الجمعة الماضية مقال قوي جداللأستاذ ابراهيم حجازي فيما يخص لاعب سيون قبل العودة المباركة بناء على اتصال علاء مبارك .
صحيح هو علاء مبارك وضعه ايه في الكرة المصرية ؟؟؟؟؟؟؟؟؟؟؟؟ ابن الريس آه نسيت
دمتم لي

65) المسابقة الكبري 3

فيه كام وزارة في مصر دلوقتي ؟

بس خلاص

أصلي لقيتهم كتير قوي

معلش يا زهر

أعزائي : اليوم 13/12 اقرأوا التعليقات جزء لا يتجزء من الموضوع وشكرا

Anonymous said...
هو حضرتك ما لاحظتيش انى قلت كل سنه وانتى طيبةعموما بسيطة يا ستى راح اعتبر نفسى ما قلتهاش راجعى التعليقات وهتعرفى
Anonymous said...
تورته وشمعة وهوف راح توحشنى مدونتك لان ده اخر تعليق لى هناعلشان كده مش عايز اسمى يظهر تانى

بسم الله الرحمن الرحيم

جاءني هذين التعليقين على بوست رقم 33/34 أيام عيد ميلادي صاحب التعليق لم يرد ذكر اسمه وعجبي ليه معرفش .. كمان عايز يسحب دعوته بتاعة كل سنة وانت طيبة ماشي وماله وعجبي برضه

طبعا لو لاحظ هو كل اللي قلي كل سنة وانت طيبة بقول في سري وانت طيب مش لازم أكتبه كتعليق وطبيعي أنا بدعي لكل الناس وربنا يعلم

أعتقد ان صاحب التعليق الباحث عن الحقيقة لأن هو وسلوى والمدرس المطحون بس اللي ليهم تعليق في نفس البوست ولو إن الباحث عن الحقيقة في الجيش على حد علمي وكلنا في جميع المدونات مفتقدين تعليقاته

مش معقولة سلوى

وكمان المدرس المطحون

معتقدش اني زعلت حد في حاجة خالص

على كل الأحوال من المفروض لما حد يزعل من حد يوضحله ليه أيوة عندي بلورة سحرية بس للناس اللي عرفاهم في الحياة بس

أنا مش فاهمة حاجة ليه زعل ليه مش عايز نعرف هو مين ليه مش عايز يزور المدونة تاني ؟؟؟ فيها حاجة وحشة ؟

الله أعلم

بس يا أصحابي وصحباتي هنا ومحلك سر

خلاص

أنا تعبت أفهم وتعبت من الناس وتعبت من الحاجات اللي بتضايقني بجد

عشان كده خلاص قريب حقفل الدكان خالص أو على الأقل حكتب وأقفل التعليقات من أصله

ولهذا الشخص أيا كان كنت أرحب بكل الناس واذا لم يرد أن يكون ضيفا على مدونتي له كامل الحرية وأحترم قراره والرجل تدب مطرح ما تحب وربنا يوفقه لمدونة أفضل من مدونتي

أستودعكم الله استنوني بأه لما أتوازن تاني

مش عارفة الناس بتضايقني ليه

اللهم أشكو اليك ضعف قوتي وقلة حيلتي وهواني على الناس

ان لم يكن بك غضب مني فلا أبالي

ودمتم

حبشتكة تاني وتالت ورابع

يا عالم يا هوووو

حتجننــــــــــــونـــــــــــي

أنا قلت محدش بيجي المدونة ومواضيعي وحشة ومهملة

قامت سلوى الحلوة قالتلي

حطي العداد وشوفي

طيب بالله عليكم النهاردة عدي كده 29 واحد محدش بل ريقي بتعليق غير ملك الكبدة راحوا فين ال28 الباقيين

طب ازاي قولولي

طب محدش بيقول رأيه ليه في الاستطلاع ؟

المجموع 116 ده حتى مفيش 16

قولوا الكلام وحش

قولوا مش مفيد

على رأي رحمة الله عليه عبد المنعم مدبولي

حيجـــنـــنــــونـــــي

42) فنتاستيكا

فتح عنيك وامشي بخفة ودلع

الدنيا هي الشابة وانت الجدع

تشوف رشاقة خطوتك تعبدك

لكن انت لو بصيت لرجليك تقع

وعجبي

ياه فينك يا أيام المدرسة

فينك يا إذاعة الشرق الأوسط

16) بقدر الله

وعجبي ..
سبحان الله الذي جعلني بقدره أشاهد جزء من برنامج استضاف الرجل المصرفي الفاضل أحمد البردعي رئيس بنك القاهرة السابق .. جعلني تمنيت أن أسمع الحوار معه من أول كلمة
الرجل كان مهذب جداً .. محدد الأفكار .. سليم المنطق مما يجعلك تشعر بصدقه لدرجة كبيرة افتقرت اليها المذيعة التي تحاوره وكأنها كانت تحاول أن تشوه صورته ولكن يأبى الله إلا أن يتم نوره .. فللحق أنوار لا تخطئها عين .. الرجل كان صريح وواضح جداً بعكس المذيعة
وبقدر الله سمعت دقيقتين من نفس البرنامج اليوم حوار مع راقصة أرادت المذيعة بكلماتها أن تشعر المشاهد كم هي مظلومة وشخصية طيبة !!!! وعجبي
حمدت الله أني لم أضيع أكثر من دقيقتين وقفلت التليفزيون.