Friday, April 19, 2013

لما تحس

لما تحس ان الدنيا ضاقت بيك قوي قوي 
وتحس إن معدش فيه حاجة تفرح 
من حال البلد لحال المسلمين لحالك الشخصي 
لما تحس انك كاره كل شئ وشخص حبيته في يوم من الأيام 
لما تحس إن لا كتابة ولا قراية ولا خروج بينفع 
لما تحس انك نفسك تلاقي وجه كريم حتى لو مش على خير وحتروح النار 
لما تحس ان حتى الحلم الكويس بقى حاجة كتير عليك 
طب عايش ليه ؟ 
آه عشان تكمل الحزن لآخره عشان تخسر اي ذكرى حلوة فاكرها عشان تتحسر على شبابك وعقلك وقلبك 
بس عشان كده 
لما تكون راكب تاكسي وتقول يارب يعمل حادثة ونخلص وبعدين تقول في سرك والسواق ذنبه ايه ربنا يسلم طريقه 
لما تحس انك خلاص مش عارف تدعي ولا تسبح ولا عايز تقف بين أيادي الرحمن وتقول يارب 
قولي عايش ليه 
لما تشوف الدنيا اسودت وكأنك اعمى معدتش بتشوف النور 
قولي عايش ليه 
لما تحس انك عويل ومفيش في ايدك حاجة تساعد بيها نفسك ولا غيرك 
قولي عايش ليه 
لما تكره الصبح والليل والشتا والصيف 
قولي 
قولي عايش ليه 
بس عايش ليه 

رجاء محدش من أصدقائي يقرى البوست ويتصل انا مش عايزة اكلم حد 
لا كلام بينفع ولا بيغير اللي يقدر يدعي يمكن دعاكم احسن مني وربنا يتقبلني تاني بسبب دعوة حد صالح فيكم 
ومتقلقوش عادي حفضل عايش الأحزان لسه بحورها كتيرة 

Thursday, April 11, 2013