ليه ؟
ليه ليه ليه ليه ؟ حظي معاكي يا دنيا كده ليه
أغنية قديمة لعماد عبد الحليم الله يرحمه كنت أحفظها وأنا صغيرة وعلقت بذهني سنين طوال وعاودتني الآن عندما قرأت تعليق العزيز سوووو صاحب مدونة عجوز وعندي 30 سنة
وبعدين يابنتي انتي قافشه على اللي بيدخل ومش بيعلق ليه ما انشالله ما عنه علق فكرة التدوين يا بنتي مش في ان الناس تقول الله وهايل وبتاع لأفكرة التدوين انك تدوني مواقف الحياه معاكي موضوع التعليق ده بقى بيبقى لو انتي اتكلمتي في موقف وانا قريته واتأثرت بيه قمت كاتب تعليق لكن مش شرط ان الكل يعلق وبعدين خدي هنا .. يعني عشرين واحد دخلو وماعلقوش وانتي زعلتي .. امال اللي بيكتبو في الجرايد والمجلات وبيكتبو الموضوع للناس اصلا وممكن الناس ولا تعبرهم .. دول يعملو ايه .. ينتحرو مثلا روقي بس انتي وصلي بينا عالنبي .. وافتحي التعليق في مواضيعك واهتمي بجزئية واحده بس انك ليكي مكان في العالم وليكي صوت وبتتكلمي وبتقولي رأيك براحتك هو صحيح مش براحتك قوي عشان بقى سهل يجيبوكي لو قلتي حاجه كده ولا كده .. لكن وماله معلش طولت عليكي .. بس ده لاني فعلا باعزك
لما بدأت التدوين مش قصتي انها تكون مذكرات بمعنى أني لا أكتب ما يجول في خاطري أو ما أشعر به أو ما يجعلني أشعر بالراحة النفسية اطلاقاً ولكن أدون لأقول كلمة قد تنبه البعض لشئ مهم في حياتهم الاجتماعية أو حتى السياسية ولكي نرتفع بمستوى تفكيرنا وطموحنا من أجل عزة بلدنا وأمتنا
لهذا دونت
التعليقات وعددها لا يهمني في شئ كم رأيت من موضوعات غير نافعة تتجاوز تعليقاتها المائة ويعلم الله أني لا أنتظر أبداً مديحاً من أحد أو سناءاً على ما أكتب بل بالعكس أحبط لأني أشير لنقطة مهمة وأجدها تغيب عن ناظر من يقرأ ردا على كلام سووو يعني محدش اتأثر بالفكرة أو فهمها فعلق على الموضوع
التعليق المهم فيه إنه يثير أفكار ورؤى عند الناس وعندي كمان يفتح نقاش يثير أسئلة تعليق المديح مجرد كسب ود من الآخرين وله مكانته ولكن ليس هذا مبتغاى من الكتابة والله على ما أقول شهيد
بمعنى لما 20 يقروا موضوع ولا واحد يتأثر أو يفهم ما أعنيه هنا بيجيلي إحباط مش عشان معبرنيش لا والله ولكن عشان مفهمش قصدي أو متأثرش يعني زي ما أقول حاسب من الحفرة ويسمعنى ولا يلق لتحذيري بالاً وبعدها يقع بزعل لأنه مصري لأنه عربي لأنه مسلم جزء من جسد الاسلام كما شبهنا الرسول الكريم اذا تداعى عضو تداعى له سائر الجسد بالسهر والحمي
عرفتم ليه بحب أعرف مين على المدونة عشان أناقشه أسمع رأيه فكره ماذا استفاد ؟؟
ليا مكان وليا صوت وبقول رأيي .. لا يا سوووو كل ده مش مهم المهم ان صوتي يوصل لأبعد مدى إن رأيي يفيد حد
كلامي ده لأني بعز سووو وكل المدونين وكل المصريين وطبعا كل المسلمين
هو انا كنت فاكرني ابتديت افهمك لكن بعد حذفك التعليق اللي عندي .. مش فاهمك سلااااااااااااااااااام
تعليق سوو التاني وطبعا سلام في رأيي غير سلامووووز
ده تعليقي بعدها
صدقتني يا سووو لما قلتلك محدش فاهمني التعليق عندك المفروض انه بيوصل على بريدك الالكتروني يعني خلاص قريته وحذفته من على مدونتك لأنه يدعو للإحباط وأنا شايفة ان الناس مش ناقصه مني احباط فلغيته لأنه ميهمش حد التعليق عشان الناس تتابع ان أنا ضاع من عمري سنين كتير وكلها من غير فايدة بعكس سو اللى كان فاكر ضاع من عمره 4 سنين بس هو لقى ليهم فايدة بس خلاص والى لقاء
وضحت ليه حذفت التعليق ووضحت التعليق كان ايه وقلت الى لقاء
هو ايه اللي الى اللقاء وايه المنطق الغريب ده يابنتي يابنتي الغرض من التعليقات ان الناس تتفاعل مع بعض تقرب من بعض تقف جنب بعض انتي باللي بتعمليه ده فعلا بتخلي الناس تبعد عنك والطبيعي انهم مايفهموكيش فكري في كلامي واحسبيه بعقلك سلااااااااااااااااام
ما هو منطقي وما هي الغرابة فيه ؟؟؟ نعم ليه ليه الناس شايفه منطقي غريب أو غير مفهوم
نعم التعليقات أن تتفاعل الناس تفهم أحسن تنقل لبعضها رؤى مختلفة مشكلتي حسابات عقلي عمري ما غلبت العاطفة على العقل أبدا وبحسب كل كلمة بقولها وكل بوست بكتبه ليه وعشان ايه وحيفيد الناس بإيه حتى والله الحبشتكة لما بقول مثلا فلان طلع في أغنية كذا قصدي ان الناس يكون عندها قوة ملاحظة وادراك للربط بين الأحداث والنتائج يعني مثلا ممثل من موديل في أغنية بقى ممثل يعني الحلم ممكن يتحقق بعد سنين الباحث عن الحقيقة ولو انه صغير السن ولكنه قال جملة انتو بتاخدوا بالكم من حاجات غريبة المهم الفكرة وصلتله أيوة خد بالك من كل حاجة وكل كلمة وكل تصرف
ده كان حوار قصير على بوست من أنت ؟
الفكرة مش في الحوار بيني وبين سوو ده مثال الفكرة ليه الناس مش شايفة اللي عايزة أأقوله ؟ ليه بيفهموني غلط ليه لازم أشرح للناس قصدي من الكلام
في موقع على النت للإختبارات اسمه تيكل فيه اختبار التفكير والشخصية وسبحان الله وكأنها رسالة كانت نتيجة ذاك الاختبار لي بأن الناس دايماً حتعارضني ومش حيفهموني لأني بتكلم في منطقة بعيدة عنهم بس لما حيقربوا حيفهموني أكتر
قلي ايه اللي عملته !!!! يخلي الناس عندها حق تبعد عني وعلى العموم أنا مسامحة ولو الناس بعدت أكيد مش أنا الخسرانة :)
ده كان آخر ردي على سووو عارفين ليه مش خسرانة لأن الله يعلم أني ببذل جهد كبير في التفكير وفي الانشغال بحال الأمة و"بإني عملت اللى عليا على قدر استطاعتي " التدوين مش هو القضية ولا التعليقات
البلد الأمة الاصلاح هي دي قضيتي
شاغلة بالي بكل فرد فيكي يا مصر بكل مسلم في العالم
أتعرفون من افتقد الآن الامام الشافعي رحمة الله عليه عندما قال
كم أتمنى أن يظهر الحق على لسان غيري
لا يهمني مناظرة الآخرين ولا أن أكون أفضل من أحد لا بعلم ولا بمال ولا بحسب ولا بجمال
الأفضلية بالتقوى والتقوى محلها القلب وما يعلم ما في القلوب إلا علام الغيوب
أقسم بالله أني أتمنى أن تظهر أفكار الاصلاح من أي شخص ويرفعوا عني عبء توصيل الفكر الى الغير لأني أضعف من أن أحتمل من الناس كلام الاعتراض المتتالي
لك وحدك يارب أنطق بكلمة الحق
لك وحدك يارب
علك ترضى عني وتنظر لي يوم القيامة
سووووو لا أحمل لك الا كل تمني بالخير مثلك مثل أي مسلم أدعو له بظهر الغيب
هذا الكلام لتوضيح فكري بعض الشئ ولن أسأل بعد الآن عمن يكون على المدونة وسأغلق التعليقات على أغلب المواضيع ما عدا المواضيع التي أطرح بها أسئلة
العزيزة جنى قالت لي مرة انت تكتبين لنفسك فلا تبتئسي وأكملي وفكرت في كلمتها كثيرا
لا ما أكتبه لنفسي أكتبه لنفسي في أوراقي وليس على المدونة وليس للقراءة العامة ولكن ما أكتبه للناس للإرشاد علّي أضئ نقطة ظلام
لذا أغلق التعليقات في بعض المواضيع وعذرا في هذا الموضوع أيضاً
دمتم لي ولوطننا بخير
سبحانك اللهم وبحمدك نشهد أن لا اله الا أنت نستغفرك ونتوب اليك
والعصر ان الانسان لفي خسر الا الذين آمنوا وعملوا الصالحات وتواصوا بالحق وتواصوا بالصبر
