Tuesday, March 31, 2009

مشاركة



ميت ألف فرصه عشان أسيب مصر
ولا عمري سبتها


علشان هى بلادي اللي بجد بحبها
بحبها بكدبها وصدقها


بحب فيها أصالة وندالة أهلها
بحب فيها السهر

بحب
زيفها وأصلها


بحب فيها طلعه الشمس
تنور وشها


بحب فيها القمر طالع
يغازل حسنها


بحب فيها المشي علي شط
نيلها وبحرها


بحب فيها بناتها
راسمين ملامح شعبها


دي بنت مايصه وحاطه
ورده فـ شعرها


ودي بنت جد ونازله
جري لشغلها


هتلاقي فين بلد
فيها الكنايس والجوامع
بتحضن بعضها


مسلم مسيحي إخوات
راضعين طيبة من صدرها
نبع الحنان ويناموا حاضنين
أرضها


هتلاقي فين تاني بلد
كل حاجه فيها
تخليك تحبها


هتقولي ظالمه هقولك
برضو بحبها
هتقولي ضالمه
مهو ده سواد شعرها


هتقولي زحمه هقولك
علشان بنعشق أرضها


هتقو لي فيها فساد
هقولك ده من طيبه شعبها


جرب كده تسهر ولو وحدك
علي ضف نيلها وحبها
جرب تشوف بنت حلوه
مع شاب واقف جمبها


بيحبها شايل في قلبه
هموم الدنيا كلها
وبرضو بيحبها


جرب كده تاكل دره وترمس
علي شطها


وتشوف وشوش الناس
وإضحك زيها


طب وإنت ماشي لوحدك
ووقعت في مشكله
مش بتلاقي ألف واحد
جمبك بيحلها


لا تعرفهم ولا يعرفوك
بس جمعكم حبها


اهي هي دي مصر
زاحمه ظالمه
فاسده ضالمه مش مهم
ده كفايه خفت دمها
هأفضل لمصر أقول وأعيد
أنا أصلي عاشق أرضها

وطبعا ده كله كلام في الهوا
أنا لو تجيني نص فرصة هقول لها
بالسلامه يا مصر
ومش عايز أشوف وشها
وهي دي بقى ندالة أهلها


هذه الكلمات جاءتني على الميل من شخص مغترب ردا على حوارات نقعد فيها ولا نمشي ؟

:)

اردت مشاركتكم وفقط

تحياتي

8 comments:

البِـئرُ والظمّأْ said...

حامده طبعا يا ال جي
بجد وهميه
وعجبتني جدااا
تسلم اديه بجد
فعلا ميحسوش بيها الا اللي بعيد عنها



زيزي

Empress appy said...

انا قاعده على قلبها شوفتى بقى

مدونة الكومي said...

كلمات رائعة فعلا....
لكن الغريب أنه بقدر ما نشتاق إليها، بقدر ما نسارع لتركها

في أجازتي الأخيرة كنت مشتاقا اليها بشده، لكن سرعان ما كرهت زحامها وفسادها وتلوثها وقلة أدبها وهمجيتها ومسخرتها

لكني رغم كل شيء أحبها من كل قلبي

L.G. said...

زيزي
تصدقي بالله الي قاعد فيها حاسس بيها بزيادة :))

==================
أبي
ما هي باقية بيك وليك يا ابي متزعليش وانا قاعدة أنا كمان بس هي اللي قاعدة على قلبي

=================
سبحان الله
يا باشمهندس أخيرا زيست الأول كنت بتقول بتحبها دلوقتي واضح انك اقتنعت اخيرا ادعيلنا باه

تحياتي

الربان said...

تحياتي

اشكرك لانك اشركتينا في قرأة هذه الكلمات الجميلة...

و شكر خاص الي كاتب هذه الكلمات.

تحياتي و تقديري

V.Hayat said...

صح ما يعرف قيمة مصر الا يبعد عنها
كل شئ فيها حلو شوراعها ونيلها وزحمتها وناسها كل شئ ان الغربة صعبة
تخياتى

L.G. said...

سيدي الربان
أين أنت ؟ وياترى ليك في الفيس بوك برضه

مرورك تاج على الرؤوس
========================
حياة
مكدبش عليك انا باه نفسي اجرب الغربة عشان زهقت من الشوارع اللي مش نضيفة والمحافظ مدشدشها
تحياتي

Anonymous said...

نفس الكلمة الجميلة اللى باحبها

مصر ليست وطن نعيش فيه

بل وطن يعيش فينا

تحياتى للكلام الرائع