Thursday, December 13, 2007

46 ) تاج أولى أول




بسم الله الرحمن الرحيم
وبه نستعين
هذا أول تاج وصل الى مدونتي بحفظ الله وأمنه من شخص لم يكن بحسباني أن يرسله لي نهائيا المدون ملك الكبدة أكيد اسكندراني وبياكل من عند الفلاح ده اسم واحد بتاع كبده مشهور جداً في الاسكنردية
المهم التاج جي من عند قطة الصحراء الى ملك الكبدة اليّ مع سلوى
لا أنكر أن اجاباته أنارت الأفق لإجاباتي بعد ذلك وفتحت أمامي عدة محاور للتفكير وكما أنه أول تاج له فهو كذلك أول تاج لي إذاً مرحباً في في أولى أول
بسم الله وعلى بركة رسول الله
لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
كنت سأنظر لهم بأنهم إخواني ولكن الفرع الفقير في العيلة بتاع التعليم بس غلبانين قوي ونظرتي للبيحصل
عندهم يا عيني يا حرام
لوكنت أوروبي أو غير مسلم هتبقي إيه نظرتك للعرب والمسلمين؟
الناس دي مجنونة ومش عارفة تعيش مش متحضرين خالص
لو قالوا لك إنت بقيت رئيس جمهورية هتعمل إيه؟
ر 1 - أهم حاجة وأول حاجة حقعد أسمع وأشوف 3 شهور وعلى خط التوازي مع ذلك أكتب وأسجل أفكاري
ر 2 - بعد ال3 شهور حكون لميت أشخاص على قدر من الكفاءة واحترام المجتمع والقوة وأضعهم في المناصب المهمة مثل الوزارات
ر 3 - حجتمع بهؤلاء كل شهر وأرى مدي التقدم واذا لم يستطيعوا تحقيق ما يضعون من أفكار أنتظر قليلا وأعمل على استبدالهم
ر 4 - حنزل الشارع كل يوم وفي كل حدث وأسأل الناس وأسمع وأشوف بنفسي
ر 5 - على المستوى الدولى حرفع كرامة المصري والمعاملة ستكون بالمثل مع أي دولة
ر 6- أهم حاجة حشتري كل شبر اتباع من أرضك يا مصر
ر 7 - حنظف البلد من الفساد بالمراجعة ومبدأ من أين لك هذا ولن أترك مرتشى واحد في البلد
ر 8 - حفتح بابي وايميلي لأي شخص يريد الاتصال بي
ر 9 - اجمالا سأضع سيدنا عمر بن الخطاب أمامي نموذج
ر10- مهم قوي يا جماعة ممر التنمية والتعمير - الأرض الزراعية - المشاريع الصغيرة - التكتلات لرأس المال عشان المصانع الكبيرة تقليل الاستيراد خالص وتشجيع التصدير - تجميع الكوادر العلمية
ر11- نفض الغبار عن براءات اختراعات المصريين ومحاولة الاستفادة منها جميعا
الأهم أسأل الله كل ليلة هل بذلت جهدي يارب هل ترضى عني يارب الهمني الصواب يا الهي
لوسمح لك برؤية الرسول عليه الصلاة والسلام وإنك تقوله كلمة واحدة ؟
حعيط من الفرحة ومش حقوله حاجة بس حقول الحمد لك ياربي
لو كنا في عصر ازدهار الأندلس كنت تتخيل نفسك إزاي؟
امرأة مسلمة عادية ترفع رأسها فخرا بالاسلام وبتعدي الشارع معرفش ليه
لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب
هيكون ايه تصرفك؟
لو مش بحبه الموضوع محسوم لأنها تضحية ضخمة لو بحبه سأستخير ألف مرة قبل الاستمرار وفي الغالب بصراحة يعني مش حكمل أأقولكم ليه عشان هو ده غرضنا الأساسي من الرجالة العيال لكن لو اكتشفت ده بعد الزواج أكيد حكمل لازم لأنه خلاص هو وأنا بقينا واحد
لو طلعت القمر هتكتب عليه ايه؟
سورة النمل آية 40 " قال هذا من فضل ربي ليبلوني ءأشكر أم أكفر ومن شكر فإنما يشكر لنفسه ومن كفر فإن ربي غني كريم " ر
لو مررت التاج لحد و ما جاوبش هتعمل ايه؟
مفيش حكتب تاج من عندي
تمرر التاج لمين ؟
أنا فرحانة بالتاج خليه معايا شوية وبعدين أديه
مخزجنجي التيجان أبونا عصفور المدينة وكمان الصقر ذو الجناح المكسور وكمان رحاب مصطفى والباحث عن الحقيقة
دلوقتي فيه مشكلة لقيت رئيس الجمهورية خد الصورة بتاعتي ينفع الكلام ده هو الريس كل حاجة ياخدها خلاص مش عايزة أأبقى ريس

13 comments:

عصفور المدينة said...

أولى أول
الدور الأول

وحمدا لله على سلامتك
إجابات رائعة وفكر هاديء يدل على نفسية مطمئنة
أتمنى ألا تطيلي غيابك عنا

على فكرة أنا مجاوب التاج ده عندنا في المخزن برقم 008

Anonymous said...

سعدت بزيارتك لمدونتى
وسعدت اكثر باكتشاف مدونتك

تحياتى لكى وارجو ان نتواصل
أحمد مصطفى

شاطئ الاسكندرية
http://alexandy.blogspot.com/

Jana said...

اجابات جميلة

بس اشمعنى يعنى بتعدى الشارع !!!!!؟؟
ههههههه

تحياتى
ودمتى طيبة

a Dreamer with feet on the Floor said...

Dear LG...
I saw U closer...and I wish U all what U wish 4 urself..
thx as U Remembered me..But Iam just a begginer ..and I can not deal with those Crowns..
but I really thank U so so much..
and appreciate U..
best Regardes

الطائر الحزين said...

اجابات رزينة
وفقك الله

تحياتى

رئيس جمهوريه نفسى said...

اولا انا بحيكى على اجابتك وخصوصا فى الى المفروض تعمليه لو بقيتى رئيس جمهوريه لانها خطوات منطقيه بجد لغرض الاصلاح
ابتسمت قوى فى اجابتك لو وصلتى للقمر اجابه غير تقليديه بجد
بخصوص الصوره والله العظيم انا جبتها من جوجل ومكنتش دخلت البلوج عندك لانى اللينك ضاع مع البلوج الى اتحذف وعلشان نبقى متفقين انا حغير الصوره علما انا جبتها من جوجل وان شاء الله لما تشرفينى بالزياره حتلاقيها اتغيرت

ملك الكبدة said...

ال جي العزيزة

اولا انتي عرفتي ان انا اسكندراني منين
ده شئ غريب و محيرني

ثانيا التاج

احلى اجابة لو طلعتي القمر و تمرير التاج

بس ما عجبنيش لو بتحبي واحد ربنا موش كاتبله الاولاد بيتهيئلي لو تحبيه تستمري معاه
عموما انا قادر اشوف انك بيتوتية بتحبي الاسرة
و بتفضليها على نفسك

و موضوع رئيس الجمهورية ده كويس بس صعب اي واحد فينا يطبق اللي قاله
كلها احلام

عموما متشكر على المقدمة اللي فوق

و كنت كاتبلك في مدونةكلام البنات اني عايز اعملكم باك لينك يا ريت لو موافقة تردي عليا او لو حطيتي باك لينك ليا عندكم اعتبركم موافقين
؟؟؟؟

L.G. said...

عصفور
طبعا مع الزقزقة بتاعة الشروق أول حاجة فعلا عصفور رحت وشفت اجابات حضرتك عندك بس للحق أنا فعلا نفسية بس مش متأكدة من مطمئنة ياريت يارب
شفت أولى أول دي
==================================
أستاذ أحمد
في ردك على تعليقي أن الرجالة مكبرين دماغهم لا لا أقصد ذلك ولكنهم مستسلمين للواقع لابد أن يكافحوا أكتر البنت لما بتلاقي الولد بيكافح عشانها صدقني هيا كمان حتكافح معاه وربنا حيوفق الاتنين - هذا فيما يخص موضوع الزواج على مدونة أستاذ أحمد
==================================
جنى
منورة وأنا كمان ضحكت مش عارفة ليه بتعدي الشارع يمكن حاجة في النفسية عقل باطن الله أعلم
انت من اسكندرية المفروض نعمل رابطة للمدونين السكندريين بجد ونوحد الآراء ونتقابل كلنا في يوم في جنينة الحيوانات عشان محدش يقول تجمع ولا يمسكونا ونكون مجموعة رأي حر ايه رأيك خايفة على العيال ماشي عندك حق
المهم البهريز بتاعك زمانك خلص على النار اكتبي حاجة بأه عشان نتواصل
=================================
الدكتور الجريح
لا مش مسامحة يهمني أعرف رأي حضرتك يعني ينفع متجاوبش على سؤال اتسأل ينفع ؟
خد الأسئلة واذكر اجاباتك الشخصية بس كده شكة دبوس
===================================
الطائر الحزين
ليه حزين وماذا ستورث وتعلم أولادك الحزن لا علمهم الكفاح والأمل ويارب تغير الاسم الى الطائر الفصيح نسيت أقول نورت المدونة
===================================
سيادة الريس
شكرا على التحية لما فتحت مدونتك لقيت عندك نفس التاج قلت مش حقرى كلامك اللا لما أخلص رد عشان مغشش منك
وحكاية التاج على العكس تماما كنت سعيدة جدا باختيارك نفس التاج ما أنا كمان جبته من جوجل الجواهرجي بتاعي بجد بسعد عندما أجد أني ألتقي مع أحد في شئ في الاتحاد قوة ياريت ترجع التاج بتاعنا
التاج ده لينا كلنا
================================

ملك الكبدة يبقى منين ؟
أحلى اجابة لأنها رد الرجل صاحب العلم الذي تفوق على الجني في احضار عرش بلقيس لسيدنا سليمان لكي لا يغتر الانسان بنفسه أبداً ويقول قول هارون لقد أوتيته على علم عندي سلم يارب
لذا دائماً أضعها نصب عيني كلما فرحت وأحسست أني أنجزت شئ مهم
فعلا شكرا التاج عندي بجد تاج الأول في مدونتي ولن يتزحزح عن القمة
حكاية أسيبه الحب بيتعوض والدنيا ماتسواش ضفر عيل بجد ولو قرأت رد عصفور المدينة على هذا السؤال قالك تعدد الزوجات البنات ساعتها حتعدد بس
أحب أن أكون صادقة مع نفسي بجد العيال مهمة زي الزوج بالضبط والله أعلى وأعلم حيحصل ايه وقتها بس لأن الخطبة عندي مجرد ارتباط ليس موثقاً غليظاً كالزواج لذا ممكن الرجوع عنه كذلك لأنه قد يترتب عليها مشاكل جمة بعد ذلك الحياة مش وردي وأنا عايزة عيال كتير عزوة يرجعولي المسجد الأقصى أمال كنت بتعلم وأنمي شخصيتي ليه
بالنسبة للرد على سؤال المريسة أحمد الله أني قد كل كلمة قلتها وقادرة على تنفيذها ومفيش صعب وكل الواقع ابتدا بحلم وأحلامنا ليست أوهام انما حقيقة مؤجلة
المقدمة أنت تستحقها
ربط المدونات في رأيي عن نفسي يعني ليست كل المدونات التي أتابعها بشغف أربطها لمدونتي ولكن مدونات محددة لشئ في نفس يعقوب رؤية تكون لدي لأني على ثقة أن المدونة الجيدة ستجد طريقها للوصول لأبعد الآفاق مثلا مدونة عصفور المدينة لابد أن أتابعها يوميا ومع ذلك لا أضيفها عندي وبعض المدونات ألغيها بعض اضافتها مجرد أسباب عقلية بحتة مدلول عقلي وفكري أتبعه في ذلك وكما وضحت الرأي للعزيزة سلوى فيما يخص مدونة كلام بنات

سلوى said...

يا جامد .. يا جامد

أجوبه جميله بتعبر عن شخصيتك

ربنا يوفقك دوما

الباحث عن الحقيقة said...

انا اسمي موجود
يا خبر
صحيح يا ولاد الخير ما يروحش ابدا
اديني اهو موجود بوشوفه
سبحان الله
علشان تعرفي ان نظرتك كان في محلها
واني واد طيب وكنت استحق الثقه دي انك تمرري ليا التاج وتفتكرينى
متشكرا جدا يا ال جي
اسف على التأخير
بس سعيد جدا وانا بشوف اسمي موجود
اشكرك اشكرك اشكرك
اجاباتك هايله
سمحتنلنا نتعرف عليكى
عارفه رغم موضوعاتك الكتيره جدا دي
بس برضه مقدرتش اكون فكره تفصيلية عن ال جي
كل اللى اقدر اقوله انى قدام شخصية عمليه جدا وعندها طاقه جميلة جدا وعندها قدرة على الانجاز والصمود والتحدي والاستمرار
والايمان
تحياتي

L.G. said...

سلوى
تحياتي لك دائما
الباحث
ايه يا بني ولا نزكي أحدا على الله صمود مين وكفاح وحاجات أنا مش أدها

عارفة ان الناس يا بتفهمني غلط يا بتزهق وتتوقف عن المحاولة
بس عارف السهل الممتنع هو ده
الشرح يطول
وأنا الليلة مشغول فالى اللقاء يا فليسوف :)

Mahmoud Bahgat said...

بسم الله الرحمن الرحيم
و دى اول مدونة اقراها فى ظل مشروع التدوين و ايامه برعاية
L.G
بجد تدوينة ظريفة جدا و الاسئلة اظرف و الاجابات نموذجية عموما انا ليا تصور تانى خالص بالنسبة لرئاسة الجمهورية متهيألى اول حاجة اى
رئيس لازم يعملها انه يعمل مجلس الشباب زى مجلس الشعب كده بس كله شباب و يضم فئة عمرية محدده لا تتعدى الثلاثين و قراراته ملزمة لمجلس الشعب انه يبت فيها و يناقشها
و الله الموفق و خدوا بالكوا من الدكان

L.G. said...

محمود
بجد أبهجت يومي عارف لما تشوف اول وردة في الحديقة اول وردة فتحت اه تعليقك ده بغض النظر عن انه في مدونتي والله
انت اول واحد استجاب بجد وعمليا لحملة احياء التدوين

وطبعا انا معاك في فكرة الشباب زي ما قلت سيدنا عمر بن الخطاب كان اذا حز به امر في الحكم فزع الى الشباب ليسألهم رأيهم
تحياتي وأشكرك جدا لأنك جعلتني ارجع ارى نفسي منذ سنين