Sunday, September 14, 2008

160) مدام فشخرة


مدام فشخرة
إعلان في التليفزيون حرق دمي .. بيقولوا قال سبب غلاء الأسعار إن الناس بتتفشخر وبتجيب أكل وترميه
حسبي الله .. حسبي الله .. حسبي الله ونعم الوكيل فيكي يا حكومة
الناس دي بتستهبل .. بيطلعولنا لسانهم
ناس مين اللي بتتفشخر
الناس بطلت عزايم وبطلت أكل
أنا واحدة من الناس من الطبقة المتوسطة
خلاص بطلنا الجبنة الشيدر
وداوني بتاع الغسيل وبعد كريستال رجعنا لزيت التموين
حرام والله حرام
الاعلان التاني بتاع الضرايب
ضرب الله على قلوبهم وعلى سمعهم وعلى ابصارهم غشاوة
يا ظلمة
الاعلان التالت
إعلان مدينة الرحاب ومدينتي
الله يجازي اللي كتب كلماته
بيقولك فيه ناس بتعيش حياة كويسة
واحنا ايه .. عيب والله
حسرونا على حياتنا ولولا بقية ايمان الناس حتأذي بعضها
حسوا بالبشر
ايه الظلم ده والافتراء ده
يا حكومة
لك يوم يا ظالم
لك يوم يا ظالم
اصل إعلان فشخرة ده حرق دمي صحيح
ياعيني على الغلابة
الغلابة تموت تتفعص
ايه الافترا ده ؟
تحديث مهم يا جماعة
إعلان برضه بس في الجرنال
بيقولك أكفل قرية
لا اله الا الله
أكفل قرية !!! طبعا رجال الأعمال
زمان كان يقولك أكفل يتيم وبعدين بقت أكفل أسرة دلوقتي بقت أكفل قرية .. قرية
طب الحكومة لازمته ايه بأه
يمشوا وإحنا نتصرف
أنا شايفة الحكومات وغيرها بيسرقوا موارد البلد بس ومش شايفين خير خالص على ايديهم لما احنا نكفل قرية لزمتهم ايه من اساسه
الصورة في مكانها يا جماعة دي ايديا مرفوعة دايماً
يــــــــــــــارب
على الظالم والمفتري والفاسد والخاين وآكل مال الشعب والحرامي وكل من شابههم
يـــــــــارب
أنت حسبي ونعم الوكيل
سامحوني ان كتبت بالعامية

7 comments:

appy said...

بيجيبوا للناس الضغط والاعلانات الهبله بتاعت الحاجات اللى مش ليها لازمه هى اللى مش فشخره حاجه تغيظ بجد

L.G. said...

أبي
ازيك عاملة ايه شفتي النقطة بيطحنوا الناس ويقولك فشخرة يابنتي خلاص الطبقة المتوسطة دي خلاص بدأوا في رأيي يتحولوا لفقرا

صحيح بقولك اعلان الرحاب كأنه بيقول فيه ناس عايشة وناس مطحونة وبيطلعلك لسانه
حسبنا الله ونعم الوكيل

منى said...

ماهو صحيح لازم تكتبى بالعاميه عشان دمك المحروق ده
منهم لله اللى حارقين دمنا
بحس انهم بجد مش عاملين حسابنا لا فى اعلانات ولا غيره وكاننا مش معاهم فى البلد دى

اكفل قريه؟؟؟؟؟؟
طبعا رجال الاعمال
يا سلام
طب هما بس يبعدوا ايديهم عن حق الناس ومش عايزين منهم حاجه
والله البوست جه فى وقته
عشان انا كمان مولعه ع الاخر
ربنا يهون بقى

سلوى said...

أغلب الإعلانات تحرق الدم أصلا

وبعدين طبقه إيه المتوسطه يا إل جي
خلاص
مش هيبقى في طبقه متوسطه خلاص

في ناس فوق
وناس تحت

حسبي الله ونعم الوكيل

L.G. said...

منى

كان دايما معلم الانجليزية في كورس المحادثة يضحك يقولي لما بتنفعلي في موضوع بيروح الانجليزي خالص ويقلب عربي وأبوظ الحصة كلها عشان الحماسة بترتفع في المكان :)))

========================
سلوى

ايوة ربنا يرحمنا

نبراس العتمة said...

أحييك أولا على مدونتك وأود أن الفت اهتمامك الى أنه سبق لي أن زرتها لكن البوست الأول غير شغال فيه التعليق..

أود أن أقول أيضا أني من أشد أعداء الاعلانات، لأن هؤلاء الناس يمررون الاعلان أمامك لمئات المرات حتى ينسل بين كريات دمك دون أن تشعر، ونصيحة للجميع ادا كنت تشاهد قناة تكثر من الاعلانات ضع أمامك جريدة أو كتاب وبين كل فترة اعلانات تكون قد استفدت على الأقل..

طرقت أيضا موضوعا حساساوهو غلاء المعيشة وما يقابله من استهجان بمشاعر الناس، وهو ما يفرض في نظري ثورة قوية على هذه القيم السوقية وأن يعي المواطن حقوقه المنهوبة ليرقى الى درجة محاسبة حاكمه، فالحقيقة أننا لا نعرف القوانين المجهزة على حقوقنا ولا نتابع الصفقات التي تمتص دماء عروقنا الا بعد فوات الأوان
مودتي

نهر الحب said...

والله كلنا محروق دمنا من الحاجات الغريبة دى
فعلا المفروض هم يمشوا ونتصرف احنا جايز تتحل

تحياتى


رمضان كريم