قول رأيك

عايز تقول رأيك

طيب ماشي اتفضل

على كل حال نورتنا

بدل الجمعة عشان حوفر ومش حدخل على النت يومين تلاتة

90) محافظة البلاط

بما إني خرجت من القمم كذا يوم ورا بعض

ومشيت في شوارع أرملة البحر

وشفت جمال العيشة في المحروسة

وطبعا حسيت بإنجازات المحافظ

أصله كان بيقول إننا حنحس بإنجازاته

يا سلام الراجل مكدبش

احساسنا بإنجازاته الفظيعة

خلانا مبقاش عندنا إحساس بالحياة أصلا

بلاش أدعي عليه

من محافظة البلاط

إل جي

89) الريس زكريا

معاصرة

عاصرت العديد من الحكام المحليين على فكرة .. مش عجوزة قوي بس بفتكر حاجات غريبة حتى من الصغر

في عصر أحدهم كان البحر ماسورة مجارى

في عصر آخر كانت البلد مقلب زبالة

في عصر الريس زكريا

أيوة نتكلم شوية عن الريس زكريا .. الريس زكريا يا جماعة في مسلسل دموع في عيون وقحة في الحقيقة فعلا هو رجل المخابرات السيد المحافظ اللواء عبد السلام المحجوب

طبعا كنت خنشورة في عهد الريس زكريا

المهم في حدود معلوماتي وعلى حد تأثيره علىّ كمواطن سكندري

السيد المحافظ كنا بنشوفه في الشارع ماشي بعربيته زي البني أدمين عادي أو تبقى راجع من الشغل تلاقيه واقف مع شوية ناس بيتفقد مشروع عادي خالص أو رايح شركة يتفقد مشروع أخد جولة ميدانية ومن غير ما يتكلم كتير ومشي مرضاش يقعد ياكل جاتوه ويسمع مدح وخلاص عمل المهم ومشي

الريس زكريا الناس كانت بتحبه وماسكة فيه بإيديها وسنانها وكل المحلات ابتدت تنظف قدامها وكمان يعملوا عمدان نور وكمان حول الرشاوي في المحليات الى تجميل المدينة ماهي كده كده بايظة بدل ما تدخل جيب الموظف المرتشي يصلح جنينة يعمل نافورة تدخل جيب الشعب

طبعا معجبش اللى فوق الوضع

بدأت حملة تهميشه وقلت بشدة صوره في الجرايد وابتدت اشاعات ان توسيع الكورنيش غلط طب محافظ اعتمد على دراسات المساحة والكليات والعلماء تبقى غلطته ما أظنش طبعا

صمم على الاحتفاظ بمستشفى الشاطبي لحين انتهاء بناء وحدة بدلها وطبعا ماما غضبت عليه وبعدين دلوقتي عايزين يشيلوا الدنيا كلها وتبقى فنادق ؟؟ حسبي الله ونعم الوكيل

بعد كده قالوا المباني المرتفعة بسببه

طب ما الراجل مشي من كذا سنة فيه عمارات 20 دور في شوارع عرض 5 متر على الأكثر اتبنت من أأقل من سنة في رقبة مين دي ؟؟؟؟

قصة أبو الهدد ححكيها بعدين لما ألاقيلها سكة من جنب الهند وانت جاي على يمينك

نهاية وبعد ابتعاد السيد المحجوب في برنامج 90 دقيقة على قناة المحور كان مستضيف ولد المفروض له براءة اختراع جهاز للعميان ولد صغير السن

عارفين الولد قال ايه في وسط الكلام

قال ان السيد المحجوب عندما كان محافظ سهل له أمر دراسة علم معين بدل ما ياخد كورس سمح له بصفة دائمة بدراسته مع طلاب كلية الهندسة ليوفر له أقصى استفادة

حاجة كمان لم نرى الاسكندرية عروسة ونظيفة إلا في أيام السيد المحجوب ولكن واحسرتاه سرقوا الطرحة وسودوا الفستان بجد والله

المحجوب أكيد مش ملاك ويمكن ليه أخطاء بس على مستوايا الشخصي كمواطن لم أعرف أبداً محافظ للإسكندرية أفضل منه أبداً ولم أحب مدينتي وأفتخر بها الا أيامه وكنت أثق به

رحم الله أيامك يا محجوب

نعم أنت محجوب عنا

رفع الله عنك الحجب وأعادك لنا

آخر دعوانا حسبي الله ونعم الوكيل , نعم المولى ونعم النصير

88) عايزة أتجوز

عايزة أتجوز

طبعا يا جماعة عنوان الموضوع المفروض يكون معرض الكتاب ولكن من أجل الترويج الاعلامي كتبت عايزة أتجوز عشان اللي دماغه تلف بيه ويعمل سيرش يلاقي البوست ويقراه حبة استخبث

وبرضه الجملة صالحة تماماً للإستخدام كل البنات عايزة تتجوز متصدقوش حاجة تانية

المهم

الله يسامحها غادة ويبارك لها قلت أكيد حيبقى كتابها عايزة أتجوز موجود في المعرض وأكيد دار الشروق حتنزل اسكندرية وسمعت ان المعرض بالفعل نزل كلية سان مارك

رحت بس عشان أشتري كتاب غادة وأرجع

اشمعنى غادة

مش غادة كإنسانة لأ غادة كرمز كفكرة عايزة أساهم في نجاح شخص مسلم اعتبرت القرشنات اللي حشتري بيها كتابها اني عملت اللي عليا يارب تجاه أخت مسلمة أو حتى تجاه فكرة طيبة يعني حتى لو غادة مسيحية مش فارقة نفس الفكرة حد بينجح أشجع خطوة صحيحة لما دار الشروق تلاقي الناس حتشتري حتنشر لناس تانية حاجات مهمة العملة الجيدة ساعتها حتطرد العملة الرديئة

أيوة في الكتابة في الهندسة نشجع الحاجة الكويسة ونقاوم الحاجة الوحشة ساعتها الكويس حيبقى والوحش حينطرد من السوق سوق عمالة سوق كتب أي سوق

وصلت الفكرة وصلت :)

المهم رحت وياريتني ما رحت

الله يسامحك يا غادة

اشتريت كتب كتير خلصت على الميزانية وطبعا كنت ماسكة ايدي اني ألاقي فلوس أروح

عجبني قوي

دار الأفق واصدارات مكتبة جرير

دار الابداع عائلة مكافحة جميلة جدا وخاصة أسعارهم والكتب والأغلفة والمحتوى دار الابداع ليهم مكتبة في المنشية

دار الشروق بصراحة العرض كان غير موفق ولكني اشتريت كتب المدونات الثلاثة

عايزة أتجوز

وأرز باللبن

وهذه رقصتي أنا

وطبعا مقدرتش أقاوم واشتريت كتاب تاكسي الخميسي مع اني كنت صامدة لمدة طويلة بس بفايدة لأن سعره مع الطبعة التاسعة رخص كتير

اشتريت حاجات أطفال

المهم عشان مبحبش أطول في المواضيع

حيكون فيه موضوع كامل لكل دار ويمكن كل كتاب قريته ونقد تحليلي للكتاب

حوفرلكم ايه مش عايزين ؟؟؟ ببلاش واللي تعجبه قصة يروح يشتريها

أمانة تشجعوا كل طيب وكل جميل وكل مافيه خير للأمة وللإنسانية جمعاء جمعاء جمعاء

زوزو

ودمتم لي

87) تليفزيووون

في التليفزيون

ما هو الاعلام ده موضوع كبير يا جماعة

في قناة أو تي في برنامج اسمه شغال محدش يسألني هو ايه اللي شغال معرفش

المهم راحوا سألوا البنات بتتكلم في ايه والولاد بتتكلم في ايه طبعا اهتميت عشان مدونة كلام البنات اللي شكلي فيها غلط المهم سمعت العجب

البنات : بنتكلم عن الموضة والولاد .. بس كده جميع الاجابات

الولاد : بنتكلم عن البنات والعربيات وواحد من باب الحياء قال الدراسة .. برضه بس كده

محدش قال حال البلد محدش قال مصايب البلد محدش قال عن أحلامنا الشغل العيشة الدنيا التكنولوجيا

طبعا البرنامج كان نازل في نادي أو جامعة خاصة معرفش ملمحتش بنت محجبة في الموضوع والولاد حدث ولا حرج موضات الشعر عجـــــــــب عجب

في العاشرة مساء

استضافت دكتور من كلية الهندسة اتكلم عن الحديد الراجل وجهه تعمر - احمر يعني - من زعله وقهرته على اللي بيحصل لسوق الحديد وعدم الاستثمار فيه في الصناعات الثقيلة ومجرد تصنيعه كحديد تسليح فقط الدكتور كان محدد وومنطق الفكر ووضح أمور عن نفسي مكنتش أعرفها

المشكلة مش في العقول والكفاءات

المشكلة في رقبتك يا ريس

على قناة Animale Planet

شفت برنامج بيلموا الغزلان اليتامي ويربوهم حاجة بصراحة جميلة اتسمرت قدام الحلقة وكأن الغزالة عيل بيربوه بجد سبحان الله وأول مرة أعرف ليه شخصية الغزالة بامبي في الكرتون والقصص منقطة

لمعلوماتكم الغزالة المنقطة صغيرة السن ولما بتكبر بتروح النقط منها وفي الترجمة اسمها حشفة

قناة جميلة مرة بردوا ربوا الأفيال اليتيمة

الطبعة الأولى

حتى الآن مازالت تصلني تعليقات في موضوعي عن أحمد المسلماني وبرنامجه الطبعة الأولى أحمد المسلماني كتاب تسطر فيه أفضل العبارات لصحبته للعلماء مثل زويل ومحمد غنيم وهذا شئ جد خطير ومهم

نعم صاحب العلماء

في قناة MBC Action

حلقة من مسلسل تظهر المسلمين وكأنهم همج .. القصة ببساطة واحد أخته اغتصبت والمحققة ساندتها على أن تتعرف على المجرم .. الأخ بقدرة قادر راح ضرب المحققة وعدمها العافية عشان فضحت أخته انها مبقتش عذراء ومش حينفع تتجوز

وكأن الاسلام عذرية فقط بعدها الحرب بالله عليكم كم مسلم تعرفوه يفعل ذلك

ممكن الناس تتخفى نعم لا تدلي بشهادتها يجوز لكن يروح يعتدي على المحققة عشان بتساعد أخته ؟؟؟

أين الاعلام الاسلامي الله يرحم العقاد مخرج ومنتج فيلم عمر المختار أو أسد الصحراء بالانجليزية

آه نسيت إحنا ورانا زنا المحارم بتاع خالد يوسف أهم

ودمتم لي

86) الحضري

سلام الله عليكم ورحمته وبركاته

لم تعد لدي الكفاءة للكتابة باللغة العربية الفصحي بدون الاضطرار للغة العامية ؟

في كل الأحوال ما يهمني هو وصول الفكرة ولو أني كنت أود أن تصل بشكل لائق عالى القيمة مما توفره اللغة الفصحى

اليوم سأتكلم عن

الحضري

المشكلة لا تكمن في تصرف الحضري المشكلة في السيستم على رأي مجدي الجلاد لماذا ؟ لأن الحضري إذا أخطأ كان سيعاقب ويكون القانون والقواعد وحتى الأعراف الكروية ثابتة ومعروفة

وإن لم نعتبره أخطأ فعذره أنه فعل ذلك لأنه خضع للإرهاب الاداري وكان هذا مخرجه الوحيد بالهروب لأنه ببساطة مش حيعرف يجيب حقه بالحسنى

هنا المشكلة أيوة لو عارف ما له وما عليه لن يكون هناك تلك الفوضى في التصرف بصراحة لا أريد الحكم على الحضري لأني لا أعرف ملابسات الأمر وقد يكون أحيط به لدرجة الهروب

ولو أني أعتقد أنه أساء لسمعته ولجماهيره بشكل سافر وكان من الممكن أن يناضل من أجل حقه بنبل حتى ولو ظلم

الجماهير

كيف يسبون أهله ؟ تصرفات عجيبة تنم عن سوء الفهم والأخلاقيات لجماهير الكرة

كان على الحضري أن ينتبه العبرة بالخواتيم

بدون عنوان

وبما أني لا أجد لحياتي عنوان

وجدتني أكتب بدون عنوان

كنت أود كتابة مواضيع كثيرة

كنت مبسوطة حبتين وهو شئ نادر جداً

ولكن عدت سالمة لجزيرة الاكتئاب

لذا

الى حين سأكتب ولكن مواضيع أخري

لأني أردت أن أكتب في تلك المواضيع وأنا في حالة على الأقل محايدة

اليوم

حسبنت لما اكتفيت من أبو الهدد واللي معينه واللي بيساعد على قعاد الاتنين

الشعب المتهاون في حقوقه

اليوم اللي بخرج فيه لقضاء مصلحة بصراحة بيخلي نفسيتي مش ولابد أبداً

جاري اصلاح العطل النفسي

ودمتم

85) هشام سليم

مع إني ماليش في الممثلين قوي يعني لا أهتم بأخبارهم بس معرفتي بهشام سليم إني شبهه بمعنى ملامحي حادة شوية وبيتقال علىّ أحيانا مغرورة وكده يعني

مع ان الزمان هدني ولا حد بيودني --حسن الأسمر

هشام سليم في العاشرة مساءاً قال كلمة مهمة قوي

سيبوني أخدم بلدي ياناس لو مش في الفن في أي مجال

شخصية عامة من عائلة عريقة وطفح وزهق وحتى صوته اختنق في بعض اللحظات من الظلم البين

لا اله الا الله

كل التداعيات في رقبتك ياريس

على فكرة حد يقول لخالد يوسف الذي يناطح بكلمة أنا لسه معملتش أفلام عن زنا المحارم خاصة وهو يلبس عباءة المناضل حالياً

ممكن تنجح قوي كمخرج خاصة وأنت بالفعل تملك أدواتك كاملة

ولكن بأفلام عن الحرب أكتوبر حكاياتها كتير

طب بلاش عندك العبارة

طب بلاش عندك قطر الصعيد

طب بلاش عندك حتى مسيرة المنتخب لحد ما كسب اللعيبة كل واحد حكاية طالع من محافظة شكل

اللي عايز يعمل فن الفن كتير مش لازم المحارم

ولا ايه؟

84) كفاية بجد كفاية

كفايــة

كفاية خليك جنب الحيط

كفاية

كفاية أضعف الايمان

كفاية

كفاية انت مش حتصلح الكون

كفاية

كفاية معلش

كفاية خليك في نفسك انت عندك عيال

كفاية

كفاية وأنا مالي

كفاية متقدرش

كفاية انهزامية وسلبية وهوان

كـــــــــفـــــــــــــايـــــــــــة يا ناس كفاااااااااية

83) مجرد رأي

رأيي

تفتكروا رأيي مهم معتقدش بس معرفتش وبرضه قلت رأيي في تعليق عند جنى الموضوع الأخير اللي كتبته مهم جداً يا جماعة الفكرة الرئيسية فيه ألا نكتفي بأضعف الايمان لوانت مؤمن بجد لازم تغير وتعدل ليه بننسى كلام ربنا

كنتم خير أمة أخرجت للناس تأمرون بالمعروف وتنهون عن المنكر

افتكر كده امتى نهيت عن المنكر .. لأ فكر مش عيلتك وأصحابك ده حق تاني بتكلم عن منكر من ناس متعرفهاش نهيت بجد طب حاولت

الأمر بالمعروف كنصيحة ولو إنها مستثقلة من الناس عموماً وممكن حد يحرجك ويرد عليك وحش لكن وماله عشان ربنا لكن في نفس الوقت خلي بالك من حدودك ولا تتعداها يعني لا تتدخل فيما لا يعنيك

فين الدين ؟

هو الدين كلام ياناس الدين فعل عمل .. زي زوج جنى كده اتصرف خد موقف مش مجرد مدونات تسرد آيات ومواعظ وبس .. الدين تجارب واصلاح ولا ايه ؟؟

مش عارفة أغلب المدونات بيتكلموا في الدين النقلي بس آيات وأحاديث طب والتطبيق والعيشة والدنيا سيرة الرسول مش حفظ سيرة الرسول نور تمشي عليه لقدام عشان متقعش في حفرة

مش مهم اسم الصحابي المهم الصحابي عمل ايه استفدت منه بإيه

في رأيي بصراحة

محبطة أيوة جدا الناس بتتكلم وبس ولما تحاول تغير يقولوك وانت مالك خليك جنب الحيط

الناس لازم تتغير الناس مش الحكومة احنا اللي خلينا الفاسدين كده وربنا حيحاسبنا عليهم والله انت قلت لمديرك انت ظالم لما ظلمك أو حتى ظلم زميلك لأ ليه ؟؟؟ عشان عندك عيال .. عشان لقمة العيش المرة .. طب ما هي مرة

في ناس بتقولي اني كنت بحارب في الشغل عشان موارييش عيال

مش صحيح

فيه محاسب كان في الشركة والمديرة قرفته عشان مرضاش يبقى من كلابها وكان بيدعو الزملاء للصلاة جماعة وكأن مجرد الصلاة جماعة عمل ارهابي وكأنه عشان مبيحبش يكدب يبقى مبيسمعش كلام الادارة

والكل كان عارف انها حترفده مع إنه كان جي بواسطة مدير الانتاج

عارفيين قالي ايه

قلت له ما تهدي الأمور شوية يا أستاذ وليد

قالي الرزق بإيد ربنا مش بإديها

بس انت عندك ولاد

قال ما معناه من نصر الله .. ينصره الله

الكلام ده من سنين

المديرة دي بحسبن عليها كل يوم كل يوم

طبعا عارفين اني مشيت من الشغل ده أكيد طبعاً تفتكروا اني كنت أأقدر أستمر

عارفين كانت بتقولي أنا مش عارفة أمشيكي .. ده كان طبعا لأنها كل ما تعملي مغرز في الشغل ربنا ينجيني سبحانه وعمرها ما مسكت عليا غلطة ولأن

امش دوغري يحتار عدوك فيك

وكمان لأن أغلب المدراء كانوا شايفين إني كفء في العمل

قالتلي أنا مش عارفه أمشيكي أنا حطفشك

وفعلا في يوم لم أستطع تحمل هوان الناس وكدبهم ومشيهم جنب الحيط على الأقل الست دي كانت عندها الشجاعة إنها تكون شريرة وواضحة

لكن الناس اللي بتصلي وساعة الجد عمرها ما تقول كلمة حق

وأخدت شنطتي ومشيت من غير ما أتكلم

بس لسه بقول

حسبي الله ونعم الوكيل من 5 سنين

يمكن أنا ضعفت وتعبت من المواجهات وانهد حيلي من كلمة الحق صحيح ولكني عمري ما أنطق بباطل وساعة الجد مازلت لازم واجبي أطبق ديني

مادمت أشهد

أنك يا الهي لا اله الا أنت

وأنك يارسولي وسيدي محمد عبد الله ورسوله

حقول كلمة الحق وحنهي عن المنكر

أشهد أن لا اله الا الله وأشهد أن محمداً عبده ورسوله عليها أحيا وعليها أموت وعليها أبعث إن شاء الله

ده موضوع جنى

موبيل .. وفوطة صفرا

82) تاني تاني

واضح إني مبحرمش رحت كتبت تعليق في مدونة من المدونات وكان الرد من صاحبة المدونة لاذع شديد اللهجة ويعلم الله يعلم الله أني عندما أقول رأي أحاول أن أرشد لخير أو أدل على فضيلة

بس فعلا مفيش فايدة خطأ بالغ مني ولا يلدغ مؤمن من جحر مرتين

حرمت يارب مش حقول رأيي عند حد

بس ليه الناس بجد بتفهمني غلط ليه بيفترضوا في كلامي العدائية خاصة أني لا أعرفهم وحتى لو افترضنا ذلك لم لا يتهاونون في الرد لحين التيقن

يعني الراجل اللي شتم مرة عادي مردتش عليه وسبت تعليقه

شفت يا جنى شكلي حقفل التعليقات خالص خالص

شكر خاص جدا لجنى لأنها من القلائل اللي بيحيروني وبيخلوني أصدق اني كويسة

الناس حتجنني

ما علينا

81) فنجان شاي

فنجان شاي

أيوة متتضحكوش أهم حاجة عندي فنجان شاي ولما بروح لأختي بقولها تيجي نحط الشاي في البراد الصيني المتحنط تضحك وتقولي أجيبلك فنجان ماشي لكن البراد شغلانة

طب بيجيبوا الصيني ليه ؟ ولا حتى الضيوف بيستعملوه طب لزوم التحنيط يعني . المهم كوباية الشاي وياريت لو مج كبير يكون أحسن أو شاي بلبن أو بالنعناع أو شاي أخضر كله تمام قوي حاجة مزاج عندي وجنبه طبعا سندويتش جبنة أي جبنة مش مهم على فكرة لقيت الفنجان ده في الاستراحة اللي جنبنا أيوة الكاشفة خته ببلاش طبعا

يا ترى الريس بيشرب في الفنجان بتاعه ولا بتاع الدولة ولو كسره يحمل ايه في قيد المصاريف ؟ بجد

حاجة بسيطة قوي بس بجد بتبسطني ايوة ما قلنا الشااااي

ايه كمان

الكريمة أو القشطدة طبعا مش عارفة الفرق مع ان ناس كتير حاولوا يشرحوهولي مع العسل الأبيض ياااه نعمة والله

طبعا مع قلة الشغل والحركة المواضيع دي مش كويسة

بس خلاص تشرب شاي

سكر زيادة من فضلك

أحلى كباية شاي شربتها من ايد غفير معبد الكرنك ومسألش عن السكر وكلنا شربناه

يوم الجمعة

رأيك ايه قولي

إذا كنت عايز تقول تعليق على أي موضوع في الأسبوع الماضى

هذا هو المكان

80) مقفلة دومينو

بس بدعي يارب تفكها حبة

أحسن عارفين معايا قافلة دومينو خالص معرفش ليه

مقلتش حاجة عارفة إني مش أحسن العابدين بس خلاص ضاقت قوي

لا شغل ولا حب ولا جواز ولا عيال ولا حاجة خالص

بس تليفزيون

زهقت

فكها يارب فكها شوية

79) ناس تشرف

ناس تشرف مصر وتشرفني الصراحة

بدون ترتيب وحسب ما تسعفني الذاكرة

رانيا علواني

شرف للفتاة المصرية الرياضية والطالبة الجامعية وعضو النادي الأهلي هي نموذج للفتاة المسلمة

عمرو شبانة

المصنف الأول على العالم .. على العالم في الاسكواش شرف للشاب العربي حتى وإن لم يناله تكريم الريس

أحمد زويل

أكيد حيكون ليه موضوع لوحده

الأستاذ محمد غانم

مين محمد غانم أأقولك في لقاء مع الدكتور محمد سليم العوا كان ينكر علينا استيراد زراير البدل ولكن ولأنه محق نوه عن رسالة من السيد محمد غانم وهو أول فدائي مصري وحارب خلف خطوط العدو في حرب 48 أيوة 48 وهو الآن فوق الثمانين وحارب وقت السلم بأن أنشا أكبر شركة في الشرق الأوسط شركة النيل للزراير والتي تصدر انتاجها الى 25 دولة على مستوى العالم

رجل فاد في السلم والحرب حد يبلغ الذي يحتفي بالكورة بس

شكرا رانيا وعمرو شبانة وياليتني أعرف باقي أسماء فريق مصر للاسكواش كلهم مرتبين على مستوى العالم حاجة تشرف بس مين يفهم يارب

شكرا محمد غانم تغنم يارب من فضل الله واحترام الناس

أعزائي كل من يعرف شخصية تستحق التكريم والاقتداء بها ياليته يشير اليها وينوه عنها لنعرفها كلنا في أنحاء مصر وندعو لهؤلاء بالثبات والسؤدد يارب

78)فاضية بأه

بما إني فاضية بأه مبعملش حاجة خالص نموذج أصلي للبطالة الجامعية والثقافية مفيش حاجة بتربطني بالعالم الخارجي غير التليفزيون والتليفون والنت بس طبعا التليفزيون بس هو اللي بيكلمني لكن النت والتليفون أنا اللي بتكلم المهم لفت نظري بعض البرامج

برنامج عجيب اسمه -حيلهم بينهم

طبعا عادي إني مش فاهمة الاسم مافيهاش حاجة يعني

المهم على قناة دبي قعدت أتفرج البرنامج عبارة عن مقلب في الضيف يهزءوه ويقرفوه وبالمرة يخلوا المشاهدين بالاستوديو يقلوا أدبهم عليه لحد ما يتنرفز يبقى البرنامج نجح وطبعا المذيع يشتم المشاهدين بالاستوديو للحبكة وممكن ممثل صديق للضيف يشارك في الإستهزاء مفيش مشكلة

أول حلقة شفتها للمنتصر بالله الذي أعرف أنه مر بعملية نتيجة جلطة أصابته عافاه الله وإيانا !!! عجبا أنرفز واحد مريض ؟؟؟ مش فاهماها دي

وبعدين حلقة لسامو زين قعد يضحك بشكل هيستيري

وآخر حلقة صادفتها لفتحي عبد الوهاب

أول حلقة قلت حكتب وأنوه ازاي يعملوا كده معندهمش احترام لنفسهم كلهم

تاني حلقة قعدت أضحك من كتر ما سامو ضحك

تالت حلقة قلت لأ الشعوب العربية بقى فيها حاجة غلط

أولا مين يقبل الاهانة وليه ؟

ثانيا ايه الفايدة نضحك على بعض طب ما الحكومات بتضحك علينا ومصر بتتقدم بينا وبتطلع لسانها كمان

ثالثا من غير ثالثا

بتفرج عليه ليه ؟

فاضية بأه منكرش

77) التدوين

سلامو عليكم

بما إن الاكتئاب في أعلى مستوياته متزامناً مع سقيع الاسكندرية

فإنني استخرت وقررت قفل التعليقات

وحظر التعليق عند الآخرين إلا فيما ندر

تحسباً لعدم زيادة حدة الاكتئاب

الباحث عن الحقيقة وعشان خاطر عيون الشاب المصري الواعد وعشان ميكتئبش مني

سوف أعمل بوست كل يوم جمعة مجرد كلمتين

قول رأيك

تقدر تقول رأيك فيه عن أي بوست اتكتب خلال الأسبوع

ولكن سامحوني حيكون قصدي اذا لم أناقش ولا أعلق على ما يكتب

حخلي رأيي لنفسي وطبعا حفكر في كل كلمة حتتقالي

الباحث عن الحقيقة

شكرا جزيلا رفعت من معنوياتي لأنك وجدت موضوعاتي جيدة

76) ليه لأ

اضحك خليك متفائل

وهون المسائل

البحر في يوم يتجمد

وف لحظة بيرجع سائل

ولو نحزن حنحزن ليه ؟

ولو نفرح حنخسرايه ؟

يا ســـــــــــــيدي عـشـــــها من قلــــــــبك

75) صباحك معطر

بسم الله الرحمن الرحيم

النهاردة صحيت بدري وافتكرت ميعاد البرنامج الاذاعي الذي كنت أحبه جريت بسرعة وفتحت الراديو اذاعة الشرق الأوسط الساعة سبعة إلا خمسة أيوه هو ده ياه لسه موجود

أبواب السماء " اللهم فتح لرجائنا رحابك ولدعائنا أبواب السماء "كأني لسه في ابتدائي

بعدها صوت أم كلثوم .. البدرية ساعة هنية

فعلا لما تسمع صوت العصفور وهو يغرد وكأن الدنيا بأكملها خلت من الهموم

همسة عتاب كان برضه برنامج اذاعي

ولو ان الكلمة رقيقة شوية بس ما علينا لفت نظري بعض الملاحظات

بنقول في غزة الولاد ماتوا في الحضانات ... فاكرين الولاد اللي ماتوا في الحضانات بمستشفى الشاطبي

بيقولوا في يوم 5 ماتوا في قذف اسرائيلي ...... في الجريدة حسبت الميتيين 50 في يوم 30 منهم في أتوبيس في مصر طبعا

أولاد بيتيتموا في غزة .. فين الناس بتوع الباخرة بدر ؟؟؟

حاكم في الامارات وزع ملايين على لاعبي المنتخب المصري ... ألم تكن تكفي تلك الملايين لإقامة محطة كهرباء في غزة المحتلة ؟

الأسعار بتغلى خاصة السمك ... هو بحر ربنا مستورد مثلا ؟؟؟

الرسوم المسيئة للرسول ... عجبا وكم يسئ للرسول الكريم تصرفات المسلمين ؟

الرسوم المسيئة .. ألم يقل الله إنا كفيناك المستهزئين ؟؟ ألا ننصر سنته قبل أن نطالب الغير بنصرته واحترامه ؟

المقاطعة المقاطعة المقاطعة السعودية وحدها بالاستيراد 5% من اقتصاد الدنمارك هكذا قرأت

الملايين الي بتبعترها الدولة ؟؟ من جيب مين ؟

هيلاري ولا أوباما ؟؟ أنا عايزة أوباما ولو إن الاعلام الأمريكي بيعد الشعب لأن تكون الرئيس امرأة وكمان شعرها كارييه أكثر من عمل مسلسل الرئيس إمرأة

تعلم الخطأ .. لا تعلم

لا فرق كل التداعيات في رقبتك ياريس

74) هي دي مصر

رحت ندوة زويل بتاكسي

رجعت من ندوة زويل بتاكسي

شفت ندوة زويل في البيـــــــــت

هي دي مصر يا عبلة

أصل الدعوة عامة وكانت لمة

عيب والله

معنديش

معنديش حاجة أقولها

حاسة ان فيه سد بيني وبين الناس

ياترى تفكيري غلط ؟

ولا الناس هيا اللي فاهمة غلط ؟

ساءني جزئية في تدوينة

هل بالفعل أفكر خطأ ؟

ما علينا

لا تدوين لا تعليق

محمد سليم العوا

الدكتور سليم العوا يا إخواني

قال رأي سديد وأهم ما يحسب لبرنامج القاهرة اليوم لقاءاته بسليم العوا

خاصة فيما يخص موضوع الفلسطينيين

بارك الله له وفيه وعليه

وحفظه من كل سوء وحماه وكفاه

لا أدري قطعوا البرنامج ليه ؟؟؟

73) يوم من عمري

اليوم كان لقاء الثلاثاء وانتهى بشكل جميل

مساعدة الطبيب لتبرر لبعض مندوبي شركات الأدوية

قالت لهم أني صحفية

ويعلم الله أن الطبيب من دماثة خلقه ولمعرفته بعائلتي منذ سنين

أتاح لي من وقته للتحدث ما لم يتحه للصحفيين

وعند خروجي حادثني المندوبين على أني صحفية ولم أستوعب كلامهم

ولكن المساعدة اللطيفة بينت لي ما أغلق علىّ فهمه

ده شغلناة الصحافة دي طلعت حاجة جامدة قوي

عاملوني وكأني شخصية مهمة

منكرش انبشرقت الصراحة

72) قدري

هل ننتبه لأقدارنا

بمعنى في رأيي أن الله يبعث لنا رسائل طوال اليوم هل نفهمها هل نتلقاها ؟ لماذا أقول هذا الكلام

استوقفني اليوم عندما كنت أقلب بين القنوات كعادتي المحببة حتى أجد ما يستهويني وجدت برنامجاً جديداً للشيخ عمر عبد الكافي على قناة الشارقة الجميلة وكان يستضيف أربعة من الضيوف ويشاء القدر أن أستمع لأحد ضيوفه وبعد أن انتهى العالم غيرت القناة وكأني فقط كان من أقداري أن أستمع لكلمته وحده دون باقي الضيوف

وأكملت يومي وبعد ذلك ليلاً كنت أقلب ثانية بين القنوات وعجباً سبحان الله نفس العالم في برنامج على قناة اقرأ يتكلم ثانية مع أني ولأول مرة أراه أحسست أن الله يرسل لي حكمة على لسانه فهو ساعي البريد القدري تنبهت وقررت أن أشارك القارئ فيما تعلمت اليوم

العالم هو الدكتور /محمد راتب النابلسي

مع الشيخ عمر لم أعرف اسم البرنامج ولكن كان كلامه أننا لا نعرف الله حق معرفته ولو عرفناه ما عصيناه وجاء بأمثلة بليغة ولكني لم أدونها ولكن كما أعتقد استقر المعنى في صدري

في قناة إقرأ برنامج موسوعة الأخلاق الاسلامية تقديم أحمد سليمان .. لا تعتقدوا في قوة ذاكرتي عفوا إنه القلم والورقة في كل ركن بالمنزل لتدوين أفكاري "عشان الزهايمر " عافانا الله ورحمنا أعتقد أني سألصقهم بيدي وكمان أنام بجانبي ورقة وقلم عشان الأفكار " مزاجها تيجي متأخرة " المهم

الرجل كان يتكلم عن التفاؤل وأن الله يعطي للعبد المنيب التفاؤل وإن كان لا يملك الأسباب المادية له ويعاقب المسئ بالتشاؤم وإن كانت الأسباب المادية له غير موجودة

ومثل على ذلك بمن يسافر ويظن أن العجلة الاحتياطي معه سليمة فيسافر مطمئن البال ومتفائل هادئ النفس ولو أن الاسباب المادية غير متوفرة لأن العجلة معطوبة والعكس بشخص أصلح له ابنه العجلة ولكنه يسافر معتقدأ أنها غير سليمة فيبتلى بالتوتر طوال الرحلة

المعنى جميل وهو ترمومتر لقياس علاقتك بالرحمن بعض الشئ

دمتم لي

71) النهاردة

وسيلة لخداع الحزن والوحدة

دخلت على مدونات بدون شهرة

ووجدت كثيرا أصابهم اليأس بدري

طيب كويس اني لسه بكتب

المهم وجدت المدونة دي كويسة ممكن نتطلع عليها

Thinking thinker

Where would I be next year? Will anyone feel any difference when I die? What am I doing here in this life?... I have to earn the answers...

So we should give him the answer :)))

طبعا الشكر الشديد لإبن حجر العسقلاني

شفت يا ابن حجر عرفت أعمل اللينك

على فكرة حتشوفوا العجب تحت عنوان القاهرة فيه 600 بلوجر فيه واحد كبير في السن بس كاتب عن الحب وكده والعجيب واللافت للنظر العرب ليه بيكتبوا بالانجليزى ؟؟؟

70) كلمتين وبس

الفريق القومي : بارك الله لكم ولنا فيكم

حسني : سلمت على أياد شرفت أنت بها ولم تستحق

مدونات في العاشرة : الحلم ممكن يتحقق

دار الشروق : مؤسسة تستحق التقدير

مجدي مهنا : نقص معيني

مصر : مقدرتش أعملك حاجة

التدوين : عبء نفسي علىّ

سلوى : مختفية

جنى : حسمع كلامك

وزير المالية : حسبي الله فيك وفي اللي عينك

شعب مصر : قوم دافع عن حقك

التعليم : سنصل يوماً

الرياضة : خطوات واثقة

السياسة : رايحين بينا على فين

أصدقاء : أشباح من الماضي

اي ميل : طيات الحزن

لنفسي : اصبري وصابري

69) وحدي

وحدي

نعم وحدي .. دائماً وحدي

أكتب وحدي .. أحلم وحدي .. أحزن وحدي .. افرح وحدي

يا إلهي وسيدي ومولاي أعرف أنك لا تسأل عما تفعل ولكني وهنت قوتي وضعفت حيلتي ولم أعد أستطيع أن أمضي في الحياة وحدي

منذ الصغر كنت وحدي وقوتي العلمية وحدها جمعت حولي الأصدقاء والمدرسين ولو أن مدرسيني بارك الله لهم ورحم من رحل عنا منهم كانوا مصدر أساسي لقوتي وشحذ همتي وحثي على المضي في الحياة

ولكن ذاك المعين يارب نضب فماذا أفعل من أين أأتي بالقوة للإستمرار ؟ الحزن يكسر قامتي ويحنى هامتي قل يارب كيف أتحمل .. أعلم أن إيماني ضعيف ولكني بشر وأنت الأعلم بحالي مني

أين الرفيق ياربي في دربي تعبت من السير على الأشواك وحدي

أصحابي كما كانت تصفهم والدتي كالأرز قد تفرقوا وبعدوا وتركوني وحدي .. حتى قصص الحب في قلبي آنات لا يسكتها صبري فأين الرفقة ياربي ؟؟ أين الرفقة ياربي ؟؟

حتى مدونتي قلت علّي أجد فيها رفقة طيبة ولكني أجد أني بيني وبين الناس سداً زجاجي أراهم ويروني ولكن لا اتصال بيننا لم لا أستطيع الوصول اليهم ؟

هل هي أفكاري ؟ هل هي كلماتي ؟ ماذا يارب

هل ابتلائي بالوحدة قدري ؟ تعبت يارب

عندما درست قصة الصحابي أبي ذر الغفاري حفرت في عقلي جملة بالقصة " يمشى وحده ويموت وحده ويبعث إن شاء الله وحده " غفرانك ربي لا أصبر على قدري ولكن لمن ألجأ ليس لي رب سواك

أخاف أن أموت وحدي لا يشيعني أحد لا يفتقدني أحد

ماذا فعلت ؟ اتبعت كل المبادئ وحافظت على كل المثل قدر استطاعتي نقيت قلبي لم أعرف خطيئتي ؟ ولكن كل ذلك لم يشفع لي

قلي ياربي ماذا أفعل

68) مجدي مهنا

وكـــأن هـــؤلاء لا يمـــــــو تــــــــون
لم الرحيل
كاتبي الراحل عني وعن قرائه لم الرحيل قد كنت فينا نبراساً نمشي في ضوئه ونتقدم . لم الرحيل ولم تودعنا ولم توصينا . هل تركت لي وصية كلمة أخيرة بم توصيني .. لا أسمعك بوضوح . لم خفت صوت مصر معك . لم الرحيل ؟
أحمد الله
أحمد الله أني عرفتك كلمة طيبة .. رأي جرئ .. قلب صادق .. أحمد الله على نعمة القراءة لأني قرأت لك وتعلمت من كلماتك .. أحمد الله أنك تمتعت بكل ذلك الحب من الناس .. أحمد الله على كثرة مشيعيك

عرفتك من جريدة المصري اليوم وتابعتك يوما بعد يوم في عمودك في الممنوع وكم أعجبت برأيك وكم وددت لو رأيتك وسلمت عليك وقلت لك سيدي لقد أضفت للحياة معنى جميلا
نعم كنت أبدأ قراءتي من النهاية من آخر الصفحات لأبدأ بقراءة عمودك اليومي وعندما قرأت تلميحاً بمرضك في كتابة أحد زملائك بالجريدة انقبض صدري وخفت عليك ودعوت أن أكون التبس على الفهم ومرت الأيام واتضح بالفعل مسألة مرضك وأن الله عافاك منها ولكني لم أتوقف عن الدعاء لك لقلة أمثالك ولشدة حاجتنا إليك .

طليق المرض
نعم خفت عليك من المرض أن يأخذك بعيداً عنا أو يضعف قوتك ولكني .. سبحان الله عرفت مدي جهلي بأحكامه . لا والله لقد جعلك المرض طليقاً حراً تحلق في سماء الحرية . كسر المرض عنك رسن الدنيا بكل ما فيها فلم تعد تكترث إلا لكلمة حق تقولها قبل أن ترحل . نعم أطلقك المرض من أسر الدنيا فما عدت لتخاف .. فمم تخاف من الموت !! لا لقد تصادقت معه وأمهلك الله قليلا.

كلمـاتك
وأنت تتكلم سابقاً كنت تقول أنك يتيم الأب منذ الصغر مما أضفى على حياتك الكثير من الجدية فقلت " كبرت وأنا صغير " وبعد محنة مرضك احسست حب الناس . لا والله لم يصلك بعد حب الناس لك .
مع أني شاهدتك في تلك الأمسية قبلاً ولكني اليوم أسمعك من جديد وأنت تتحدث عن مصادر السعادة وأن الانسان يجب أن ينوعها .. سيدي كنت لي مصدر سعادة وفخر .. رجل يعرف معنى كلمة الحق .. رجل يقولها عالية مدوية لا يخاف .. عندما قلت " الغلابة في مصر كتير قوي " ياااه نعم كم كنت تشعر بنا بالشعب كله . يعلم الله أني لم أكن أعرف هل أنت مسلم أم مسيحي كل ما أهمني أنك مصري عربي انسان تدافع عن كلمة الحق

نهـايـة
وعندما دخلت على أمي تبكيك وتقول لي لقد توقفت أجهزة جسدك عن العمل وما هي الا لحظات تبقى فيها معنا . بكيتك ولو أني قررت أن أوقف نفسي عن البكاء لأي سبب ولكني عجزت عن احتمال الفقدان . نعم لقد تيتمت اليوم وكلما فقدت شخص يحب الانسانية ويسعى لخيرها واعلاء كلمة حق أشعر باليتم . حتى والدتي عندما فاض بها كيل التدمير الذي يحيط بمدينتنا الاسكندرية لجأت لك وكتبت خطابها تستنجد بكلماتك علها تذود عنا ما يفعله الحاكم الاقليمي وحرصاً على ما كتبت جاءتني بخطابها لأراجعه وأصرت أن أرسله لك . كانت ترى فيك سندا ومنبراً عالى لكلمة الحق . لا أذكر أنها راسلت صحفي من قبل ولكنك زرعت فينا الأمل في التغيير في الاصلاح . لأنه ان وجد أمثالك فالوطن مازال بخير

رحلت
نعم رحلت .. ولكن كلماتك باقية . نعم رحلت .. ولكن دعاؤنا مستمر .. نعم رحلت ولكن الذكري تأبي أن ترحل سيدي ما النهاية الا بداية جديدة حياة بلا ندم بلا أوجاع . لا تقلق " الا من أتى الله بقلب سليم " لا تقلق دعائي لن ينقطع . نعم أحزن لا تنكر علىّ حزني . أحزن لأني امرأة لم أستطع أن أشيعك في جنازتك .. نعم أحزن لأني لم أقل لك كم أحترمك وأقدرك .. نعم أحزن لأن هناك أناس لا يعرفون للحق طريقاً حظوا بلقاءك والجلوس معك ولم أحظ بذلك .. نعم أحزن لأنك مضيت وتركتني كما مضى أبي من قبل
ولكن عزائي " إنا لله وإنا اليه راجعون " اللهم أجرنا في مصيبتنا وأخلفنا خيراً منها
قد يكون صوت من أصوات الحق خفت ولكن وكما قالت أمي عندما نظرت لصورتك عند الوداع
وكـــأن هـــؤلاء لا يمـــــــو تــــــــون

67) وداعاً

وداعــــاً

وداعاً رجاء النقاش

قرأت لك منذ الصغر في مجلة الشباب وعلوم المستقبل

لا أتذكر هل كانت مقالاتك تحت عنوان عصفور

تخونني الذاكرة ولا أنسى الفضل

ولكن وداعاً

ولقاء مع كتاب القلم والانسان

ان شاء الله

ربي رحمتك وسعت كل شئ فلتسع كاتبي الحق معاً

فكرة جميلة

آخر حاجة خلاص مش حكتب تاني دلوقتي

بس حاجة جميلة عند عصفور المدينة

على يمينك في المدونة كاتب آخر ما تابعت

في موضوعين بجد لفتوا نظري

موضوع الكابلات ومشروح بالصور مفيد جدا وجميل صراحة

من مدونة الصارم الحاسم

وموضوع الكابتشينو من مدونة لماضة

معلش مبعرفش أخلي اللينك اسم

مسيري أتعلم

66) بين أوراقي 1

والدتي تشكو من أوراقي وكتبي بالمنزل وهي جد كثيرة ومبعثرة

بين تلك الأوراق يكمن ما تعلمته من الناس ومن الكتب وكل حكمة أردت أن أتمسك بها لكي لا تفلت من ذهني وتظل ماثلة أمامي أذكر بها نفسي لأظل مقاومة لتيارات التغير تبعاً للواقع المرير

لكي أستطيع أن أمسك بجمر الخلق في قبضتي فلا أضيع

He who is really Kined can never be unhappy

He who is really Wise can never be confused

He who is really Brave is never afraid

Confucius

ان كنت طيب الأخلاق فلا تحزن أبدا

ان كنت حكيم فلا تضطرب أبدا

ان كنت شجاع فلا تخف أبدا

هكذا قالها كونفشيوس وهكذا ترجمتها لنفسي أعلم أن الترجمة اللغوية ستعطي معنى على الاطلاق وليس هناك في رأيي شئ مطلق تماما خاصة فيما يخص سلوك البشر ولكن هكذا استقر المعنى بقلبي

تلك الكلمات نقلاً عن أجندة مواعيد لمدير لي بالعمل فوجئ بي أطلب منه الأجندة ليس لجدولة مواعيده ولكن لنقل المعلومات بها رحمة الله عليه كان متسع الأفق وتركها بحوزتي لحين انتهائي من نقل المعلومات متيقناً بحرصي على إبلاغه بمواعيده قبلها بوقت كاف

اتعلمت معديش ورقة من غير ما أقراها

65) المسابقة الكبري 3

فيه كام وزارة في مصر دلوقتي ؟

بس خلاص

أصلي لقيتهم كتير قوي

64) بلد المليون سؤال3

وَاللَّهُ خَلَقَ كُلَّ دَابَّةٍ مِنْ مَاءٍ فَمِنْهُمْ مَنْ يَمْشِي عَلَى بَطْنِهِ وَمِنْهُمْ مَنْ يَمْشِي عَلَى رِجْلَيْنِ وَمِنْهُمْ مَنْ يَمْشِي عَلَى أَرْبَعٍ يَخْلُقُ اللَّهُ مَا يَشَاءُ إِنَّ اللَّهَ عَلَى كُلِّ شَيْءٍ قَدِيرٌويدخل في لفظ دابة هنا برضه الانسان :من يمشى على رجلين كما في الاية سورة النور ايه 45
الاجابة للباحث عن الحقيقة

من مدونة استراحة الكاشفة

سأل طفل صغير والده

يابابا انت بتقول ان الانسان خلق من تراب والملائكة من نور والشيطان من نار

طيب يا بابا الحيوانات من ايه ؟؟

وأطرق الأب قليلا وسبح السؤال حتى وصل لصديقتي وقالته لي والآن

أنتظر أيضاً الاجابة مثل الطفل الصغير

من ايه ؟

63) لقاء الثلاثاء 2

كان لي صديق فيلسوف بأقوال الحكماء شغوف سألته يوماً عن ..و

تذكرت تلك الكلمات للسيدة سميرة عبد العزيز في برنامج اذاعي كنت أعشقه رغم صغر عمري وقتها يسمى صديقي الفليسوف وذهبت الى صديقى طبيب العائلة لنكمل ما بدأناه سابقاً

كعادته استقبلني بابتسامته الجميلة وكأنه خال من كل هموم الحياة

حياك الله يا طبيبنا هل تكمل لي الحكاية

نعم ابنتي فلنكمل

بعد صراخي حملوني وجاءوا لي بالطبيب الذي خاف من معالجتي وحملوني الى المستشفى وكانت العربة تتعثر كثيراً فلم تكن الطرق في تلك الأيام ممهدة كما هي الآن وكنت أتألم ألماً مبرحاً

وأدخلوني فوراً للعمليات كان عندي انفجار في الزائدة الدودية وفي تلك الأيام كانت الأدوية ضعيفة فلم تكن هناك المسكنات والمضادات الحيوية مثل الآن وكنت أرى شبح الموت يراودني يومياً .. كل ما استطاعه الطبيب أن قام بالعملية وتركني لنصيبي ولجهد جسدي في التعامل مع التلوث الذي أحدثه انفجار الزائدة الدودية وبعد ثلاث أيام ومن كثرة الصديد فتح الجرح من تلقاء نفسه وخرج الصديد من جسدي وقد يكون ذلك ما أحياني

وتماثلت للشفاء ولكن شعرت وقتها واستقر في نفسي مدى أهمية الطب والعلاج للبشر وتابعت علومي وكنت متفوقاً وكان المعتاد في عائلتي اما دخول كلية الحقوق والالتحاق بالسلك الدبلوماسي أو الرجوع لمباشرة أملاك الأسرة

ودخلت كلية الحقوق وكنت صغيرا جدا في السن ولم أستسيغها ولم أحتملها وعدت ودرست العلوم الأخري كان نظام التعليم مختلف تماما عن الآن أو ما درستموه أنتم

وتفوقت وحزت أفضل الدرجات مما كان يؤهلني وبجدارة للإلتحاق بجامعة كامبريدج بلندن

وجاء يوم نتيجة تقدمي للجامعة ولكنه حدث أمر غير متوقع نهائياً قضى على حلمي للإلتحاق بالجامعة

تابعونا

تهنئة

تهنئة خالصة من القلب

ودعاء لله

لفريق الكورة أيوة

ولادنا

والله وعملوها الرجالة

مبروك لمصر وعقبال الكاس يارب

مش كاس برضه أصلي ماليش في الكورة

اعذروني

62) تعلمت من عصفور

تعلمت أن الله يحاسبنا على الأفعال وليس المشاعر

تعلمت أن معرفة الناس كنوز ولكن ليس كل ما يلمع ذهباً

تعلمت أن أتعلم من كل قول وفعل تعلمت أن أحب أمي مهما اختلفنا ولا أعارضها

تعلمت أن ألجأ لربي فالباقي فان تعلمت أن أجتهد ولا أنتظر النجاح فقد يأتي من طريق آخر

تعلمت أن أفعل الحق واتبعه ولا أجتهد في التفكير في العواقب

تعلمت أن احترم نفسي أهم من أن يحترمني الآخرين

تعلمت أن أعامل الناس بظاهرهم وأترك بواطنهم لله

تعلمت أن أجاهد أن أثبت على الدين فلا أهم من رضا الله

تعلمت أن أدعو للناس بظهر الغيب من أعرف ومن لا أعرف

تعلمت ألا أترك حقي مهما صغر تعلمت أن أنصح ولا ألح ولا أنصح إلا من يستحق أو يطلب النصيحة

تعلمت أن أدعو وأدعو وأدعو حتى آخر نفس

تعلمت أن أتذكر كل من أكرمني ولم يعرفني وأشد على يد كل انسان قال كلمة حق

يااااه تعلمت أني لم أتعلم الكثير مهما علمت وأن فوق كل ذي علم عليم وما أوتينا من العلم الا قليلا

ممكن أكتب بوست عندي زيه أصلي اتعلمت كتير قوي ولسه عايزة أتعلم أكتر

ده كان تعليقي على موضوع تعلمت من مدونة عصفور المدينة

اتعلمت كمان أن أثق باحساسي الداخلي الغير مبرر لصدقه معي

تعلمت أن أحاول فقد تنجح المحاولة

تعلمت أن من يبعد عني لم يكن ليبقى ومن بقى لم يكن ليبتعد ( أقصد الأصدقاء )ز

تعلمت أن أشكر الله على بعض الصداقات وان فشلت فقد ساندتني وقت الحاجة

تعلمت أن الموت حق

تعلمت أن الحياة مرة

تعلمت أن اليتم لا ينقضي بطول المدة

تعلمت ألا أصدق الناس ولا أعتب عليهم

تعلمت ألا أناقش من لا يسمع

تعلمت أن أصعب شئ على الانسان الســـــكـــــــــوت

61) عايز مين ؟

تنويــــــــه هـــــــــــام

يا أصحابي وصحباتي

يا جماعة رجاء بجد مش هزار اكتبوا أسماء ناس تنفع تمسك البلد

بنقول الحكومة وحشة وماله تتشال سهلة بس ما هي بتتشال وبيجي أزفت منها

نعد كوادر خير الأول وبعدين نقول نغير

يعني مين يعني بدل حسني مين بجد ؟؟

عايز مين وزير ؟

للعلم لا أعرف على وجه الدقة عدد وزارات مصر وطبعا لا أعرف وزرائها ولا اماكنها ولكني ألمس مدى فشلها وتدني كفاءتها جميعا في خدمة المواطن والوطن

لذا وتضامناً مع أفكار مدونة ملك الكبدة الذي بدأ بالفعل وضع خطة التطوير والتفعيل لنقيل مصر الحبيبة من عثرتها

أحببت أن أضع الأشخاص الموثوق فيهم والذين هم فوق مستوى الشبهات

في مواضع الوزراء وطبعا مرحب بالمشاركة في برنامج

عايز مين ؟ وزير رئيس وزراء أو حتى رئيس الدولة

مبدئياً

لوزارة الصحة قررنا نحن إل جي تعيين السيد الدكتور محمد غنيم وزيراً للصحة

لوزارة البحث العلمي قررنا تعيين السيد الدكتور أحمد زويل

لوزارة الأوقاف وتبعاً لها الأزهر الشريف السيد الدكتور محمد سليم العوا

لوزارة الشباب والرياضة تعيين الأستاذ جلال علام لإنجازاته المشرفة مع فريق الاسكواش وان اعتذر عن تسلم مهامه يكون الاختيار بينه وبين السيد محمود الخطيب لإلتزامه بحسن الخلق وتربيته في الحقل الرياضي ومعرفته به

لوزارة ...حفكر وأكمل ومن له آراء أخري عليه بكتابتها

السيد اللواء عبد السلام المحجوب له حرية الاختيار بين رئاسة الدولة أو الرجوع لمنصبه كمحافظ لمدينة الاسكندرية

معلومة السيد اللواء المحجوب كان رجل المخابرات المكلف بالعميل جمعة الشوان في مسلسل دموع في عيون وقحة ولكن على أرض الواقع

عروسة المدونين

خبر مفرح
عروسة المستقبل ستطل على شاشة دريم في العاشرة مساءاً اليوم
وكذلك في البيوت أسرار يوم الجمعة التاسعة والنصف تقريبا في ايه ار تي عيون

ادعو لهذا الرجل

http://fielsamem.blogspot.com/

في مدونة في الصميم

وتحت عنوان ادعو لهذا الرجل

وجدت ضالتي نعم لندعو جميعا لهذا الرجل فأمثاله قليلون وقلمه حر ونحن في أشد الحاجة له

أول ما أطالعه في جريدة المصري اليوم عموده الأستاذ مجدي

فلنرسل له الدعوات مكتوبة أو بظهر الغيب

كلما أعز الله شخص فاضل يحارب ولو بالكلمة من أجلنا نجد العزة ترجع لنا

اسأل الله العظيم رب العرش العظيم أن يشفيك

60) أنا مش معاهم 2

بسم الله الرحمن الرحيم

رداً على التعليقات التي جاءتني عن موضوع غزة

وجدت في مدونة الربان الرد الشافي والجامع لكل ما أود قوله أو شرحه فيما يخص ذاك الموضوع وبشكل محدد وممنطق وبلغة راقية يفتقر اليها البعض مثل تعليق الشخص غير المعرف

للعلم فكرت بالغاء تعليقه لأني لا أرحب بالكلام المتدني ولكني وجدت ترك التعليق أفضل لنرى جميعا ما وصل اليه الحال في لغة الحوار والتفاهم

عمدة المدونين عصفور المدينة خالفني الرأي ولكنه ملتزم دائماً بأدب الحوار أعزه الله وكذلك وجدته بالفعل وضع تدوينة الربان عنده في آخر ما تابع هذا يعلمنا أن نسمع ونعقل ونفكر قد نري وجهة نظر تستحق التفكير فيها لذا تحية له هكذا يجب أن نكون

كنت أود أن أمحو كلمة عزبة أبوه في كتابتي عن الريس ولكني وجدت تركها للأمانة ولكي أرى أخطائي ماثلة أمامي فلا أعود لها لذا رجاء الرجوع لموضوع الجدار عند الربان

http://al-roban.blogspot.com/2008/02/blog-post.html

دمتم بخير