Wednesday, March 26, 2008

112) أفكــاري

أفكاري
مكتوبة فين ؟؟
في كل حته ناقص تتكتب على الحيطان
طب والنهاردة
النهاردة على هوامش المصري اليوم جنب سودوكو اللي جننتني النهاردة
طب كتبتي ايه قولليلي
أأقولك فساد ولا بلطجة
أيوة عرفت ده من الموضوع السابق
اضحك الصورة تطلع حلوة
ازاي
في العاشرة مساء قاعدة ظريفة وزير صناعة سابق قعد 10 سنين وقال كلمة حكمة قال ايه أقولك .. قال أنا معملتش حاجة خالص .. بارك الله في مجهوداته الصراحة راحة يا عيني
د/ جودة عبد الخالق أمين اللجنة الاقتصادية لحزب التجمع .. كلام مهم واضح ان الحزب ده يستحق المتابعة يا سيدي الراجل متزن وكلامه في الصميم
وكاتبه ايه كمان
فيه راجل بتاع الوطني يتكلم ويبص لدكتور جودة يتكلم ويبص له لاحظ معايا كده اللي على حق بيتكلم وعينه لا تزيغ بعكس الذي على باطل يحاول استكشاف رد الفعل
كل ده على هامش الجرنال
أيوه شوف كمان
نيران صديقة في القاهرة اليوم الأمريكان طسوا واحد عيارين موتوه في القناة بتاعت أبونا بس الصراحة هما آسفين .. يا جماعة وماله نيران صديقة وبعدين ايه يعني دبانة راحت من بلد الدبان زعلانين ليه لو حوت كان راح كان معلش كانت الثروة السمكية اتأثرت لكن متقلقوش الدبان كتيييير وبيتوالد
ملحوظة عمري ما شفت ولا عرفت اسم الوزيرين اللي كانوا في قاعدة العاشرة شكلي كنت بره البلد من غير ما أعرف الوزرا دول حرام بيعملوا ولا حاجة زي ماقال الوزير في صمت شفت التفاني
من بلد الدبان اللي قرفت الحيتان
دمتم لي

4 comments:

Jana said...

ال جى الجميلة ..مع انك فكرتينى فى التدوينة دى بحاجات كتير من اللى تحرق الدم
الا انى معرفتش امنع نفسى من الضحك ..لما قلتى ..ناقص اكتب على الحيطان
عارفة افتكرت مين ؟؟ ..جمال الدولى ...انا باعتبره على فكرة ..او مدون فى عالم التدوين..وناوية اعمل عنه تدوينة خاصة ان شاء الله
يمكن احتاج مساعدتك فيها خصوصا لو طلعتى كنتى زيى مدمنة قراية حيطان

L.G. said...

طبعا ده أنا عندي مهمة رسمية في قراية الحيطان وبزعل لما بتتبيض والكلمات المأثورة تختفي
بس أنا فكرتك بجمال الدولى الله يسامحك الحمد لله الذي عافانا :)
أنا عندي مشكلة أني بحب أكتب على الحيطان لأني كنت ممنوعة من ذلك من الصغر حخلي ولادي يكتبوا على الحيطة بصراحة

الباحث عن الحقيقة said...

والله فيه وزراء فعلا سابقين الواحد بيشوفهم وبيستغرب هم كانوا فين ولا احنا كنا فين
ايه البلد اللى الحكومة فيها تايهه عن الشعب والشعب فيها تايه عن الحكومة
ههههههه

L.G. said...

معنى انك متعرفش شكله وقعد 10 سنين يبقى فيه حاجة غلط